Lawiswis ng Salita ni P. Nicanor F. Lalog II, Ika-29 ng Oktubre 2019
Tula na aking hinalaw sa “The Portal of the Mystery of Hope” ng makatang Pranses na si Charles Peguy (pe-gi). Bagamat hindi siya debotong Katoliko, nang maglaon malaki ang naging impluwensiya sa kanya ng Katolisismo hanggang sa siya ay mamatay noong 1914 sa Villeroy, France.
Sa tatlong pangunahing birtud nating taglay mula sa Kanyang mapagpalang kamay sinabi ng Diyos: "Pag-Asa ang aking pinaka-paborito" sapagkat ito lamang aniya ang "nakasosorpresa" sa kanya.
Paliwanag ng Diyos, hindi siya nasosorpresa sa Pananampalataya dahil sa kanyang kaningningang taglay aba'y bulag at manhid lamang ang sa Kanya'y hindi magkamalay!
Hindi rin Siya aniya nasosorpresa sa Pag-ibig sapagkat maliban na lamang kung sing-tigas ng bato ang puso ng tao at hindi pa sila magmamahalan sila na aniya pinaka-aba at kaawa-awa sa lahat ng kanyang nilalang.
Ngunit itong Pag-Asa ay kakaiba Diyos ay laging nasosorpresa dito nakikita kapangyarihan ng kanyang grasya para mga tao ay umasa pa kahit wala nang nakikita!
Alalahanin sulat ni Apostol San Pablo sa mga taga-Roma: "ang pag-asa ay hindi pag-asa kapag nakikita na ang inaasahan. Sapagkat sino ang aasa sa nakikita na?"
Kakaiba sa pagiging positibo ang Pag-Asa dahil nakabatay ito sa mga nakikitang palatandaan o mga senyales upang mahulaan at matanawan tinatantiyang kalalabasan ng isang inaasam.
Optimistic ang tao na umaasa gaganda panahon o iigi sitwasyon batay sa mga indikasyon na kanyang nakikita; ngunit ang taong umaasa batid niya mas lalala pa mga bagay at sitwasyon, mas malamang hindi na iigi pa.
Ito ang kaibahan at kaibayuhan nitong Pag-Asa na kahit talo na at wala nang nakikita kumpiyansa sa Diyos ay di nawawala.
Sa ating panahon ng social media kung saan ang lahat ay nakikita at ipinakikita, kitang-kita pa rin ang katotohanang mga dakilang bagay sa buhay ay mula sa mga hindi nakikita.
Iyan ang nakasosorpresa sa Pag-Asa, kahit wala ka nang nakikita kitang-kita Kita pa rin Panginoon namin kaya aking hiling ako'y lagi mong sorpresahin!
Lawiswis ng Salita ni P. Nicanor F. Lalog II, Ika-28 ng Oktubre 2019
Mula sa Google.
Todos los Santos na naman at kay laking kabaligtaran naka-ugalian ng karamihan ipagdiwang mga aswang at katatakutan sa halip na mga banal at kanilang kabutihan.
Dati-rati nama'y hindi laganap sa ating kapuluan banyagang kaugalian pagdiriwang ng Halloween na nasira tunay na kahulugan sa kaisipan ng mga makamundong taga-kanluran.
Halloween ang taguring na nagmula sa pinagsamang "hallowed evening" na kahuluga'y "gabi ng mga banal" ngunit pilit binabalikan ng mga hangal maling paniniwala noon pa napasinungalingan.
Akala ng mga paganong Druids ng Scotland at Wales sa Bretanya noong unang-una lumilitaw sa lupa tuwing katapuasan ng Oktubre mga impakto at masasamang espiritu upang makabihag ng mga tao.
Nagdaramit sila at nag-aayos na nakakatakot parang multo, kamukha ng mga lamang lupa sa paniniwalang malilito mga impakto na sila'y kasamahan kampon ng kadiliman at kasamaan kaya sila iniiwan at hindi sinasaktan.
Maraming Kristiyano hindi ito nalalaman ni nauunawaan nakalimutan pangunahing katotohanan ating pinananaligan nang pumarito si Hesu Kristo, kanya nang tinalo kapangyarihan ng demonyo nang pumaroon siya sa dako ng mga yumao.
Nang mabuhay mag-uli ang Panginoong Hesu Kristo napanibago niya buong sangnilikha higit sa lahat, muli nating nakamukha Diyos Ama sa ati'y lumikha, tiniyak ating tahahanan sa piling niya sa kalangitan.
Bakit nga ba ikaw, Kristiyano ang siya pa ngayong lito at sadyong lilo mas ibig pag makamukha mga impakto at demonyo nakukuha pa ninyong matuwa at ikagalak mga anak ninyong mukhang tiyanak?!
Akala ba ninyo demonyo ang mga nalilito sa inyong pagbibihis at pag-aanyong multo? Hindi ba ninyo batid kayo ang nalilinlang sa pagdaramit at pag-aayos ng hunghang at magtataka pa kayo asal ng inyong anak parang animal?
Madalas kay hirap unawain mga gawi natin na katakutan kabutihan at katuwaan ang kasamaan; sadya nga bang atin nakalimutan dakilang karangalang tayo'y nilalang katulad at kawangis ng mabuting Maykapal?
Diyos ang kamukha natin kanyang liwanag sana'y mabanaagan din sa atin upang maghatid ng kagalakang bumubukal sa malinis at magandang kalooban lipos ng kabanguhan ng kabutihan at kadalisayan.
Lawiswis ng Salita ni P. Nicanor F. Lalog II, Ika-22 ng Oktubre 2019
San Juan Apostol at Ebanghelista, Patron ng Bayan ng Diyos sa Bagbaguin, Santa Maria, Bulacan. Larawan ay kuha ni Bb. Jo Villafuerte, Pistang Pasasalamat 22 Setyembre 2019.
Minamahal naming Patron na Banal, Juan Apostol at Ebanghelista po ang inyong ngalan ngayo'y aming ipinagdiriwang sa buong Simbahan dalawang bagong Banal, kapwa pastol ng kawan, nang manungkula'y pangalan mo ang hiniram.
Nauna'y si San Juan Beinte-tres nang sa kanyang katandaan tulad mo, sinikap maging makabuluhan at buhay na palatandaan ng Diyos ang Inang Simbahan sa gitna ng makabagong panahon nang kanyang simulan ang Ikalawang Konsilyo sa Vatican.
Kasabay niyang tinanghal bilang Banal ang tinaguriang Dakilang San Juan-Pablo Ikalawa labis na pagtitiis ang kinamit sa kanyang sakit, krus ay sinapit, katulad mo’y naging malapit sa Ina ni Hesus kaya’t “Totus Tuus” ang kanyang awit.
Itulot mo aming Mahal na San Juan Apostol at Ebanghelista, kaming iyong mga anak sana’y matularan pinagsikapan ng dalawang bagong San Juan: pamilya’t sambayanan mabuklod sa kaisahan katulad ng dalangin ni Hesus sa Huling Hapunan. AMEN.
San Juan Ebanghelista, ipanalangin mo kami. San Juan Beinte-tres, ipanalangin mo kami. San Juan-Pablo Ikalawa, ipanalangin mo kami.
Lawiswis ng Salita ni P. Nicanor F. Lalog II, 07 Oktubre 2019
Larawan ay kuha ni Rdo. P. Gerry Pascual sa Basilica of the National Shrine of the Immaculate Conception, Washington, DC, 09 Setyembre 2017 .
Maraming salamat, mahal naming Ina, Birheng Maria sa iyong pagsama sa amin tuwina ngayong inaala-ala iyong himala sa pakikipag-digma ng mga Kastila sa Look ng Lepanto dinarasal iyong Santo Rosario.
Kay sarap namnamin damang-dama namin sa bawat butil ng Rosario pakikiisa mo sa amin upang higit naming sundin butihin mong anak at Panginoon namin na siyang kapanatilihan ng Diyos sa piling amin.
Dahil kay Kristo Hesus na isinilang mo sa amin, Panginoong Diyos naging kapiling namin palaging dumarating maging sa gitna ng mga unos at sigwa nitong karagatan ng buhay namin tumatawag para kami ay sagipin.
Mula sa panganib ng karagatan at latian hanggang sa katihan kailanman ay hindi kami iniwan ni Kristo Hesus na iyong isinilang upang kami ay pangunahan pabalik sa aming tahanan doon sa kalangitan ikaw ngayon nakapisan.
Maraming salamat Mahal naming Ina Birheng Maria nawa amin kang matularan si Hesus ay masundan sa nakakatakot na karagatan at kapanatagan ng kapatagan kanyang mukha sa ami'y mabanaagan kami rin mismo maging misteryo ng iyong Santo Rosario.
Lawiswis ng Salita ni P. Nicanor F. Lalog II, 04 Oktubre 2019
Mula sa Be Like Francis Page sa Facebook.
Minsan daw ay nagimbal kaibigang Kardinal ni San Francicso na banal nang kanyang malaman dukha nilang pamumuhay na sa kanyang palagay labis na kahirapan hindi naman dapat nilang pagdaanan.
Katuwirang ipinaliwanag ni San Francisco kay Kardinal Hugolino kay gandang pagnilayan sa malalim nitong kahulugan: "kung tayo'y maraming kayamanan," aniya ng ating banal "kakailangan din natin mga sandata upang mga ito'y ipaglaban at pangalagaan."
Sa kanyang isipan at banal na kalooban, ang pag-ibig ay namamatay kapag tao'y nagkamal maraming ari-arian; hanapin kanyang paliwanag kung masasagot kanyang mga katanungan na tila bugtong di lamang sa isipan kungdi pati na rin sa puso at kalooban:
"Mapagnanakawan mo ba na tao na walang ano man? Maari mo bang gutumin ang nag-aayuno? Mayroon ka bang sisirain sa taong namumuhi sa parangal at pagkilala? Ano nga ba magagawa sa taong aba at dukha?"
Para kay San Francisco ang mga dukha ang tunay na malaya kayang ipaubaya lahat pati sarili sa Bathala upang makagawa ng kabutihan sa kapwa na siyang simula ng ating kapatiran at ugnayan pati sa kalikasan.
Mula sa Reuters.
Sa ating panahon ngayon karukhaan ay pinag-uusapan batay sa kawalan ng ari-arian na kabaligtaran ng kung ano mayroon ang mayayaman na kadalasan mga bagay nabibilang at nabibili gaya ng kapangyarihan.
Ngunit kung ating pagninilayan ano mang mayroon ang mayaman ay wala pa rin o "NOTHING" kung Inglesin natin dahil ang higit na mahahalaga ay hindi nakikita ni nabibili o nabibilang gaya ng pera at iba pang kayamanan.
Gayun din naman hindi masasabi ng sino man na siya ay dukha at "walang wala" ika nga dahil kung tutuusin natin ang lahat ay palaging mayroon pa rin o "SOMETHING" kung Inglesin din natin.
Harinawa'y mapagtanto natin sa pagdiriwang ng kapistahan ni San Francisco na butihin ito mismong buhay natin ay dakilang kayamanan na dapat ipagpasalamat natin sa karukhaan ng loobing maialay gaya ng Panginoon Hesus natin.
Ang Krus ng kapilya ng San Damiano na isinaayos ni San Francisco batay sa tinig na kanyang narinig habang nananalangin doon.
Lawiswis ng Salita ni P. Nicanor F. Lalog, 26 Setyembre 2019
Larawan kuha ni G. Jim Marpa sa Carigara, Leyte, Setyembre 2019.
Kay sarap pagmasdan at maliliman lalo na sa gitna ng kainitan ng matayog na puno may malalabay na sanga mga dahong luntian.
Mainam ding pagnilayan talinghagang nababalot nitong larawan mga kahulugan at kaugnayan ng mga kataga na puno at pinuno sa punong kahoy din naka-ugat.
Husay ng ano mang puno ng tahanan at pamayanan, tanggapan at paaralan, simbahan at pamahalaan natatagpuan sa kabuuan, walang kasiraan.
"Integrity" sa Inggles hiniram sa wikang Latin, "integer" at "integritas" na kahuluga'y "intact" o buo: nakakabit, sama-sama hindi sabog at kalat-kalat.
Ito ang tinaguriang integrity: karangalan dahil buo ang pagkatao nababakas sa kanya larawan at wangis ng Lumikha na Siyang pinagmumulan at pinag-uugatan ng ating katauhan at karangalan.
Sa isang pinuno, ito ang batayan at ugat ng kanyang pamumuno buo at hindi wasak, may kaisahan kanyang iniisip, sinasabi at ginagawa kaya siya ay buo at mayroon karangalan.
Malalaman natin kung tunay at hindi huwad ating pinuno kapag kanyang katauhan ihalintulad sa punong kahoy upang matukoy kanyang karangalan.
Malalim ba kanyang pagkakaugat sa katotohanan at kabutihan hindi pumapanig at di mabubuwal ng kasinungalingan?
Matuwid at matayog ba kanyang mga pananaw at inaasam, sinisikap matanawan, masundan kaliwanagan ng katotohanan at katuwiran?
Nagsasanga hindi ang dila kungdi mga bisig upang abutin di lamang langit kungdi iba pang sanga upang lumabay at liliman sino mang kumakanlong?
Katulad ng puno ng kahoy ikababagsak o ikatatayog ng sino mang puno ng sambahayan, pamayanan, pamahalaan, at simbahan ay nasa kayang kabuuan o karangalan bilang nilalang.
Lawiswis ng Salita ni P. Nicanor F. Lalog II, Ika-17 ng Setyembre 2019
Relasyon at ugnayan hindi emosyon at damdamin ang sabi natin na pangunahin turo sa atin ng talinhaga ng alibughang anak.
Kay gandang larawan ng Diyos ang nakintal sa ating puso't isipan nang ilahad ng mahabaging ama sa dalawang anak niya na sila ay iisang pamilya, binibigkis ng buhay na mula sa kanya.
Ano mang kasalanan ay mapapatawad maging kamatayan ay malalampasan nitong habag at awa ng Diyos na ibinuhos kay Kristo Hesus para sa ating mga alibughang anak niya.
Ganyan ang habag at awa ng Diyos bilang Ama na dumadaloy din mula sa kanyang pagiging ina nang mawika niya, "hindi kita malilimutan kailanman katulad ng isang ina sa kanyang anak na mula sa kanyang sinapupunan."
Para sa kanilang kaisipan, ang habag at awa ay "hesed" --- damdaming napaka-lalim gaya ng pag-ibig nagpapahiwatig ng maka-amang katapatan at pananalig.
Nagmumula ito sa sinapupunan o "raham" --- yaong matris ng kababaihan na siyang kanlungan ng simula ng buhay, lundo ng katuwaan pagsapit ng kagampan kapag napawi mga agam-agam, pagsilang ng bagong buhay.
Kapag umiiral habag at awa sa ating buhay doon tayo buong-buo sa pagkatao nagiging ganap at banal tulad ng Diyos puno ng buhay at pagmamahal.
Kaya't kapag mga patayan ay naglipana at pagkitil sa buhay ang nakikitang paraan upang lunasan maraming kasalanan at kasamaan nasisira ating kapatiran, di maglalaon, tayo ang mababaon.
Lawiswis ng Salita ni P. Nicanor F. Lalog II, Ika-16 ng Setyembre 2019
Maraming salamat, Rdo. LA Bautista sa kanyang pagninilay para sa Misa kahapon.
Ang Pagbabalik ng Alibughang Anak ni Rembrandt. Mula sa Google.
Hindi ko pa rin mapigilan pagnilayan at namnamin kahulugan ng talinhaga ng alibughang anak at ama niyang mahabagin.
Ugnayan at relasyon, hindi emosyon batayan ng Mabathalang awa at habag ang siyang tinuturo ng Panginoon dapat sana tayo ay magkaroon.
Kapag namamalas natin tanawing hindi nakagigiliw tulad ng mukhang nahahapis at tumatangis, kapansanang nakahihindik o kapalarang mapait ating damdami'y naaantig, kaya tayo ay naaawa.
Ngunit, wala naman tayong magawa kungdi lumuha at kung mayroon man maibibigay, kaunting barya ay tama na; kaya naman kung hapis sa kalooban ang tinitiis hindi natin ito pansin kaya kahirapan ng iba ating pang diniriin.
Ito ang masaklap nating nakakalimutan Katulad ng magkapatid sa talinhaga na kapwa alibugha: Dahil sa kanilang pagkagumon sa mga kayamanan Ugnayan nila sa ama at isa't-isa, nawalang tuluyan.
Masdan at namnamin, sinasabi ng Ama sa atin, "Anak, lagi kitang kapiling; lahat ng akin ay sa iyo rin. Dapat tayo magsaya at magalak kapag inyong kapatid Ay nagsisisi at nagbabalik" (Lk.15:31).
Ang Diyos ay ipinakilala sa atin bilang Ama sapagkat buhay nating lahat sa kanya buhat na tulad ng sino mang ama, sinisikap itaguyod at pangalagaan protektahan at ipaglaban kung sakaling pagbantaan.
Relasyon at hindi emosyon ang batayan at pinagmumulan ng awa at habag sa atin ng Diyos nating Ama kaya naman kahit ito ay mawala at mamatay kanyang hihintayin, hahanapin, at bubuhayin pa rin!
Lawiswis Ng Salita ni P. Nicanor F. Lalog II, Ika-26 ng Agosto 2019
Mula sa Google.
Ano ba itong pinagsasabi ni Imee na technically wala tayong bayani kasi walang upisyal na sinasabi kung sinu-sino ating mga bayani?
Pati ba naman sa mga bayani kailangan pang gamitan ng technicality?
Kung sabagay, hindi rin masisisi si Imee sa pagsasabi at pag-iisip ng ganiri dahil ito ang nakadidiri: pamilya niya'y yaring nagpipilit kilalanin silang bayani!
Technically, Imee, maski pilitin mo kami kailanma'y hindi magiging bayani iyong dadi lalo na noong kami'y inyong dinale Nobyembre 2016 nang dalhin ninyo siya sa Libingan ng mga Bayani.
Kailangan pa ba ang technicality gayong nauuna palagi pagkabayani maliban lamang kapag wala naman talagang kabayanihang nangyari!
At ito ang higit na nakakadiri sa pinagsasabi ni Imee: hindi maikakaila, huling-huli pineke ng kanyang dadi pagkabayani na hindi naman nangyari at ni walang nakasaksi maliban kanyang sarili?!
Napatunayan ng U.S. Army noon pang 1980's sa masusi nilang pagsasaliksik na isang panloloko at walang katotohanan mga pinangalandakang U.S. war medals ni Marcos noong ikalawang digmaang pandaigdig.
Higit pa sa technicality kungdi historicity ang nagsasabi sino talaga ang bayani sapagkat tiyak na mamumulaklak at hahalimuyak ano mang buti naihasik ng sino man na bayan ang inuna bago ang sarili!
Lawiswis ng Salita ni P. Nicanor F. Lalog II, Ika-13 ng Agosto 2019
Larawan mula sa GMA News.
Bata pa lamang ako hindi ko na gusto ang buwan ng Agosto bago pa mauso tawag nila dito na buwan ng mga multo.
Nasa grade two ako nagtataka na ako bakit tuwing Agosto mabagal takbo ang panahon?
Ito ang bumaon sa murang isipan ko noon kaya hanggang ngayon hirap ako na umahon na tila baga nilalamon at nilalason ng karanasan kahapon.
Nagkataon lang ba nitong ilang taon bakit nagkagayon takbo ng buhay ko sa ngayon tuwing Agosto nagkakapatong-patong mga hindi mabubuting sitwasyon, lihis sa mga nilalayon?
Parang katulad ng lagay ng panahon mapanglaw ang kalangitan bumubuhos malakas na ulan parang walang katapusan katulad ng aking mga luha sa mga tao na di ko malaman kung kaibigan.
Kung minsan maiisip ko hindi lang buwan ng multo ang Agosto kungdi pati ng impakto at demonyo dahil kung titingnan ko ano ba ito, matapos lunurin tayo ng ulan saka naman sisikat matinding init ng araw?!
Iyan daw ang dahilan kaya maraming sakit sa katawan hanggang kasu-kasuan lagay ng panahon hindi maintindihan sala sa init, sala sa lamig parang mga tao sa paligid walang paninindigan, kay daling mang-iwan.
Bawat araw ng ating buhay ay pagpapalang kaloob ng Diyos nating mabuting-loob ngunit kung minsa'y nakakasama ng loob kapag tila lahat ay nakataob at ika'y nakasubsob.
Aking lang inaasahan at pinanaligan pagkatapos ng tag-ulan, doon mga dahon ay luntian sa bawat unos na dumaraan, nasusubok katatagan ng halaman mabalian man ng sanga o malagasan ng bunga naiiiba na siya at lalong gumaganda sapagka't sa bawat pagkakataon at panahon, Diyos ay naroon.
Larawan ay kuha ni G. Howie Severino ng GMA News sa Taal, Batangas, Nobyembre 2018.
