Ano – o Sino – ang Inaabangan sa Pasko?

Lawiswis ng Salita ni P. Nicanor F. Lalog II, Ika-6 ng Disyembre 2021

*Larawan kuha ng may-akda sa San Fernando, Pampanga, 18 Nobyembre 2021.*

Taun-taon, 
halos lahat ng tao
nasasabik sa Pasko
palaging inaabangan
sa mga countdown.
Ngunit bakit nga ba
inaabangan natin ang Pasko?
Petsa lamang ba ito 
at panahon na dumarating,
lumilipas din? 
Kung gayon lang ang Pasko,
bakit hindi na lang tayo 
magbilang ng araw
Bagong Taon pa man?

Higit sa petsa 
at panahon ang Pasko
dahil ito ay ang Diyos na naging Tao;
ang Pasko ay si Hesu-Kristo 
na sumilang noon sa mundo 
at dumarating pa rin sa puso 
ng bawat tao kaya't itong Pasko 
ay isang katotohanan, isang kaganapan
nang ang Diyos ay makialam
at pumasok sa ating kaguluhan,
pinunan marami nating kakulangan,
pinawi mga kasalanan, pinalitan 
ng kanyang kabanalan upang 
buhay natin ay maging makabuluhan.

Sa panahon pa ring ito 
ng pandemya, sana atin nang 
mapagtanto ang Pasko 
ay hindi tanong ng kung ANO 
kungdi ng kung SINO inaabangan 
na tanging si Hesu-Kristo,
dumarating hindi sa sabsaban
kungdi sa ating puso at kalooban
kung saan nagmumula ating mga
gulo at kadiliman; sikaping matagpuan
Kanyang bakas sa ating mga mukha
upang tayo'y makipag-kapwa at 
maranasan Kanyang kapanatilihan
kesa tayo magbilang ng mga petsa at buwan.

Panalangin sa Adbiento: Ihanda daraanan ng Panginoon

Lawiswis ng Salita ni P. Nicanor F. Lalog II, Ika-03 ng Disyembre 2021

Kay sarap namnamin,
O Diyos Ama namin
paglalarawan ni San Lukas
ng panahon noong dumating 
si San Juan Bautista sa ilang
upang ihanda daraanan ng 
Panginoong darating:

Ikalabinlimang taon noon ng paghahari ni Emperador Tiberio. Si Poncio Pilato ang gobernador sa Judea, si Herodes ang tetrarka sa Galilea at ang kapatid naman niyang si Felipe, sa lupain ng Iturea at Traconite. Si Lisanias ang tetrarka sa Abilinia. Sina Anas at Caifas naman ang mga pinakapunong saserdote noon. Nang panahong iyon, nasa ilang si Juan na anak ni Zacarias. Dumating sa kanya ang salita ng Diyos…
Lucas 3:1-2

Dumating ka na sa amin, Panginoon,
sa panahong ito sa gitna ng social media
ng mga nakabibinging ingay 
at mga sari-saring tanawin sa amin ay
umaaliw ngunit madalas ay sagwil
upang Ika'y makita at maranasan 
kay Hesus na palaging dumarating
sa gitna ng kasaysayan ng daigdig
maging sa sariling buhay namin.

Nawa matularan namin si Juan Bautista
upang ilang ay puntahan, maglaan ng
panahon ng pananahimik upang 
Iyong mga salita ay mapakinggan at
mapagnilayan, maranasan pananahan
Mo sa amin kay Kristo.

Itulot po ninyo, O Diyos,
sa liwanag ng Espiritu Santo
aming matularan si Juan doon sa ilang
aming maisigaw upang umalingawngaw 
sa mundong nagbibingi-bingihan  
sa Iyong mga panawagan na tuwirin
aming landas ng pamumuhay:
nawa'y masaid namin aming puso
at kalooban ng aming kapalaluan
at mga kasalanan upang mapunan
ng Iyong kababaang-loob, pag-ibig
at katarungan;
katulad ni Juan ay maging tinig nawa kami
ng katotohanan sa gitna ng pagpipilit ng
marami na bigyang katuwiran mga 
kasinungalingan at kasalaulaan;
tambakan nawa namin bawat lambak
ng kababawan at kawalan ng kabuluhan
ng katuturan at kahulugan kay Kristo 
lamang matatagpuan;
at higit sa lahat, nawa aming matibag
sa mabubuting gawa at halimbawa
mga bundok at burol ng aming
kayabangan at katanyagan,
maalis aming mga tarpaulin at ilawan
at tanging ikaw lamang O Diyos
ang aming matanawan, sundan,
at paglingkuran magpasawalang-
hanggan.  Amen.

*Larawan kuha ng may-akda, Adbiento 2020.*

Parol ating pastol

Lawiswis ng Salita ni P. Nicanor F. Lalog II, Ika-16 ng Nobyembre 2021

*Larawan kuha ng may-akda, 11 Nobyembre 2021.*

Hindi ko maiwasang umindak
sa awiting "kumukuti-kutitap,
bumubusi-busilak" tuwing 
makakakita ng mga parol 
nakasabit sa mga binatana,
binebenta sa kalsada
kahit malayo pa ang Pasko.

Ang mga parol ay tulad ng pastol
umaakay sa atin sa gitna ng dilim
hatid ay liwanag at galak
upang matunton at marating
Sanggol na sumilang sa sabsaban
habang mundo ay balot sa kasamaan
upang tayo ay tubusin sa ating mga kasalanan.

Makukulay, puno ng sigla
alalaong-baga, buhay na buhay
itong mga parol at iba pang mga palamuti
hatid ay hindi lamang ngiti sa labi
kungdi tuwa at kagalakan sa puso at kalooban
isang taon na naman matatagpusan
kahit COVID-19 kayang lampasan!

Katulad ng mga bituin at tala
mga parol at palamuti ng Kapaskuhan
matutunghayan lamang sa gitna
ng malaking kadiliman kagaya sa ating buhay
kung kailan mayroong kapighatian 
at lahat ay nalalabuan, doon naman
nagiging maliwanag at makulay ang lahat!

Isang kabalintunaang tunay
ganda at busilak ng mga parol
sa atin nagpapastol tungo sa
liwanag ng kinabukasan;
sana manatiling nagningning 
liwanag ni Kristo sa puso at 
kalooban natin.

Aking dasal at hiling
ngayong Paskong darating
sana matapos na itong COVID-19;
matularan sana natin mga parol
magpastol sa kawan, huwag silang maligaw
sa kadiliman  ng mga mapanlinlang 
tanging Diyos ang maging sandigan.

Aral at alaala ng kapa ni San Martin ng Tours

Lawiswis ng Salita ni P. Nicanor F. Lalog II, Ika-10 ng Nobyembre 2021

*Larawan mula sa Parokya ni San Martin ng Tours sa Bocaue, Bulacan.*

Mula pa sa aming kabataan
palaging nilalarawan kabutihan
ng Patron naming mahal 
San Martin ng Tours sa France 
kung paano niyang hinati 
kanyang kapa upang damitan
at huwag malamigan dukhang
matanda nakasalubong sa daan.

Kinagabihan ay kanyang napanaginipan
Panginoong Jesus sa kanyang paanan
tangan-tangan kapang ibinigay sa 
matandang tinulungan, kaganapan ng
kanyang katuruan na ano mang kabutihan
ang inyong gawin sa mga maliliit at 
nahihirapan ay siya rin ninyong
ginagawa sa Kristo na sa atin nakipanahan.

Nguni't hindi lamang iyon ang hiwaga
ng kapa ng ating Patrong mahal 
na dating kawal, sanay sa mga digmaan:
nang siya ay mabinyagan, 
hinasa niya kanyang isipan upang matutunan 
mga aral ng pananampalataya na kanyang
dinalisay sa taos-pusong pananalangin
kaya't lubos siyang napaangkin sa Panginoon natin.

Upang maging mataimtim 
sa kanyang pananalangin, 
nagtutungo si San Martin sa kagubatan
at hinuhubad suot niyang kapa upang 
isampay at ibitin upang sakali man 
siya ay kailanganin, 
madali siyang tuntunin 
tanging kapa niya ang hahanapin.

Mula sa "kapa" ni San Martin
na noo'y kawal sa France
nanggaling salita na "kapilya"
na mula sa "chapele" ng mga Pranses
na tumutukoy sa kanyang kapa na hinuhubad
tuwing nananalangin at ngayon gamit natin
sa munting pook-dalanginan upang tulad
ni San Martin taimtim din tayong makapanalangin.

Kay sarap pagnilayan at tularan
halimbawa ni San Martin ng Tours:
hinubad kanyang "kapa" ---
kapangyarihan at katanyagan
upang maramtan ng katauhan 
ni Kristo-Jesus na "hinubad kanyang 
pagiging katulad ng Diyos upang mamuhay 
bilang alipin tulad natin" (Fil.2:7)!

Tanging panalangin na laging hiling

Lawiswis Ng Salita ni P. Nicanor F. Lalog II, Ika-01 ng Nobyembre 2021

*Photo by Irina Anastasiu on Pexels.com*

Diyos Ama naming mapagmahal
ngayong Dakilang Kapistahan ng
Lahat ng mga Banal, 
aming dasal ay higit naming maunawaan
kahulugan nitong pagdiriwang:
hindi katatakutan
o mga kababalaghan 
at hiwagang nakamamangha
kungdi ang Iyong dakilang
adhika na kami ay Iyong makasama
at makaisa sa buhay na walang
hanggan.

Madalas aming nalilimutan
ito lang naman lagi din naming
dasal higit pa sa lahat ng mga
pangangailangan at inaasam-asam:
kung sakali mang dumating
oras na aming kinatatakutan
biglang kamatayan sa ano mang
paraan, O Diyos huwag mo kaming
kalilimutan sa hanay ng iyong mga Banal
upang Ika'y makapiling magpakailanman!

Kaya naman sa pagdiriwang
nitong todos los Santos
nawa aming mabatid
kahalagahan ng pamumuhay
na matuwid; ang kabanalan
ay hindi kawalan ng kasalanan
kungdi pagiging puspos
ng Iyong pagka-Diyos, nagsisikap
matupad banal mong kalooban
sa ilalim ng Iyong kaharian.  Amen.

Alab at rubdob ng mga Apostol

Lawiswis Ng Salita ni P. Nicanor F. Lalog II, Ika-27 ng Oktubre 2021

*Larawan kuha ni G. Cristian Pasion, Pambansang Dambana ng Fatima sa Valenzuela, Abril 2021.*

Siya ang ikasampung Apostol
ng Panginoon ayon sa hanay ng
pagkakahirang, tinaguriang Simon
na Makabayan, kabilang sa pakikibaka
laban sa mga mananakop na Romano
noon; isang Cananeo mula sa bayan ng
Cana kung saan naganap unang himala
ng Kristo nang gawin niyang alak ang
tubig sa piging ng mga bagong kasal.

Kay gandang paglimilimihan
paglalarawan sa kanyang katauhan,
mayaman sa kahulugan dapat
nating tularan upang masundan
lubusan ang Panginoon
bilang kanyang mga alagad
sa makabagong panahon
tulungan mga tao na makaahon
at makatugon sa maraming paghamon.

Kung tutuusin
 magkatulad  ang dalawang
taguring na sa kanya ay ginamit:
Makabayan at Cananeo
 na sa wikang Hebreo nagpapahayag
 ng alab at rubdob na kapwa
 mga katangian ng Diyos nating
mahabagin na tanging hiling
Siya lamang ang sambahin at susundin.

Kilalanin man siya sa kanyang 
mga taguring Makabayan 
o taga-Cana, Galilea,
itong ating patron si San Simon 
naging masigasig, puno ng alab at 
rubdob sa paglilingkod hanggang
kamatayan kasama si San Judas Tadeo 
sa Persia, nagpapaalala sa ating
isabuhay tuwina pananampalataya kay Kristo!

Kung Ikaw si Bartimeo?

Lawiswis ng Salita ni P. Nicanor F. Lalog II, Ika-23 ng Oktubre 2021

*“Jesus healing the Blind Man”, painting ni G. Brian Jekel noong 2008; mula sa http://www.Christian.Art.com.*

*Una ko itong nilathala
noong ika-30 ng Oktubre 2018;
isinaayos ngayon kaugnay
ng ebanghelyo sa Linggo.

Anong buti na ating pagnilayan
kuwento ng bulag na si Bartimeo
sa gilid ng daan nananahan
inaasam na siya ay limusan
dahil sa kanyang kapansanan;
ngunit nang kanyang marinig
at mabalitaan pagdaraan ng Panginoon,
dumalangin siya nang pasigaw:
"Hesus, Anak ni David, mahabag po kayo sa akin!"

Nang siya ay pagsabihang manahimik,
lalo pa niyang ipinilit kanyang giit,
"Anak ni David, mahabag po kayo sa akin!"
Kaya't napatingin at napatigil si Hesus
upang siya ay tawagin at tanungin:
"Ano ang ibig mong aking gawin?"
Ang agad niyang mariing hiniling,
"Panginoon, ibalit po ninyo
aking paningin."

Kung ikaw si Bartimeo at ngayon
ay tatanungin ng Panginoon natin,
"Ano ang ibig mong aking gawin?"
Ano kaya ang iyong hihilingin?
Mga palagiang alalahanin tulad ng 
salapit at pagkain?  Mga lugar
na minimithing marating?
O marahil ay alisin pasanin
at dalahin sa balikat natin?

Sadyang marami tayong naisin
at ibig hilingin sa Panginoon natin
ngunit kung ating lilimiin bulong
 nitong saloobin at damdamin natin,
isa lang naman kung tutuusin 
kailangan natin:  mapalalim
pananampalataya natin
at maliwanagan sa buhay natin
upang matahak landasin patungong langit.

Aanhin mga malinaw na mata
na sa kinang ng ginto at pilak nahahalina
ngunit hindi makita ni makilala 
mga taong tunay at tapat nagmamahal 
 mga sumasalamin sa Diyos nating butihin!
Kaya kung ikaw ay hihiling, si Bartimeo ang gayahin
hiniling kaliwanagan sa puso't loobin
upang Diyos ang makita at kamtin
at Siyang maghari sa atin!

Si San Francisco at ang Mabuting Samaritano

Lawiswis ng Salita ni P. Nicanor F. Lalog II, Ika-04 ng Oktubre 2021

Ngayong ating ginugunita
dakila nating pintakasi
San Francisco ng Assisi
huwaran ng kaisahan
sa kapwa at sangnilikha
nang kanyang tularan
Panginoong Hesus sa kabutihan
 Mabuting Samaritano sa nangangailangan. 

Sa buhay ni San Francisco
ating mababanaagan
paano niyang pinakisamahan 
mga may sakit at nahihirapan
maging sarili niya kanyang tinalikuran
iniwan kayamanan, karangyaan
at karangalan upang ituring
kanyang pinsan ang kamatayan.

Malinaw kay San Francisco
 "brother sun" at "sister moon"
ang tanong ay hindi kung
"sino ang aking kapwa?"
kungdi "ako ba ay nakikipag-kapwa?"
dahil tayong lahat ay iisa
at magkakaugnay sa Diyos ating Ama 
sa pamamagitan ni Kristo na ating Kuya.

Kaya sana bago natin dasalin
kanyang panalangin na maging
daan ng kapayapaan
pabasbasan ating mga alagang
hayop at halaman,
ating munang tingnan at suriin
kaisahan natin sa Krus ni Hesus 
na siyang nagligtas at nagpalaya sa atin!

San Francisco ng Assisi,
Ipanalangin mo kami.

Paano pumunta sa langit?

Lawiswis ng Salita ni P. Nicanor F. Lalog II, Ika-13 ng Setyembre 2021

*Larawan kuha ng may-akda, La Niña Maria sa Pambansang Dambana ng Fatima, Valenzuela, 07 Setyembre 2021.*

Bisperas ng kaarawan
ng Mahal na Birheng Maria
matapos manalangin
bumati si Andrei ng
"Happy birthday, Mama Mary!"
sabay sabi sa kanyang mommy:
"Bibili ko sana siya ng cake
pero paano ako mapupunta
sa langit?"

Tunay ang sinabi
ng Panginoon noong dati:
mula sa mga labi ng bata
nahahabi karunungang
walang pagkukunwari;
pawang katotohanan 
kay dali nilang bitiwan
nakakatuwa dahil puno ng karunungan
tila bugtong na palaisipan.

Madali namang malaman
kasagutan sa kanilang mga tanong
ngunit bakit nga ba ganoon
sa pagkakaroon ng gulang ng taon,
kamusmusan nati'y
nawawala, napapalitan
ng pagmamaang-maangan
kunwa'y hindi alam
pangunahing kaalaman sa buhay.

Katulad ng paano nga ba
pumunta sa langit?
Hindi natin masambit
gayong palagi nating
nilulungating masapit
dahil mayroong pagsusulit
at baka tayo sumabit
kaya hangga't maari
sa kasalukuyang buhay kumakapit.

Paano nga ba pumunta
sa langit?
Hindi ka naman mamatay
daglit
Ngunit ang turo ni Hesus
palagi niyang sambit,
limutin ang sarili, pasanin ating krus 
kada araw at sa Kanya'y sumunod -
 papuntang langit!

Aral ng lumot sa panahon ng pandemya

Lawiswis ng Salita ni P. Nicanor F. Lalog II, Ika-25 ng Agosto 2021

*Larawan kuha ng may-akda sa Tam-Awan, Baguio City, 2018.*

Minsan isang umagang kay panglaw
sikat at busilak ng araw aking tinatanaw
ako ay gininaw sa malagim na katotohanan
hindi pa rin papanaw 
at patuloy pang hahataw 
pananalasa nitong pandemya;
Kahit mayroon nang bakuna
dumarami pa rin mga nahahawa
isang paalala maaring lumala pa
bago humupa at tuluyang mawala na.

Noon din ay aking namataan 
mga tumutubong halaman 
sa kapaligiran tila nagsasabi
huwag susuko
magpatuloy sa paglago
ano man ang panahon
tagtuyot o pag-ulan
manatiling luntian
maski mga dahon lamang
saka na mga bulaklak at bunga.

*Larawan kuha ng may-akda, Malagos Gardens, Davao City, Agosto 2017.*

Pinakamahalaga
manatiling buhay at umunlad
sa gitna ng karahasan
aral ng mga halaman
sa ati'y kay lalim at
napakayaman sa
kahulugan na maari nating
tularan at gamiting aral
na gagabay sa ating buhay
ngayong panahon ng pandemya.

Sa lahat ng halaman
na lubos kong kinagigiliwan
bukod sa hindi ko kailangang
mga ito ay alagaan 
ay ang mga lumot
sa sumusulpot 
maski sa mga sulok-sulok 
na kahit malimot
tutubo at lalago, kakapal
parang alpombra sa mga paa!

Hindi gaanong naabot
ng liwanag itong lumot
ngunit kay lamig sa paningin
kay gandang tanawin
kung ating susuriin
nagsasabi sa atin
ng himig ng lilim at dilim
tinig na mahalumigmig;
hindi man masikatan ng araw
mayroon din busilak sa kadiliman!

Paalala sa atin ng mga lumot
ngayon ang panahon ay masalimuot
katotohanan at kagandahan
nitong ating buhay
bumubukal saan man malagay;
Maykapal sa ati'y hindi humihiwalay
pahalagahan at pangalagaan
lahat ng ating taglay
dahil walang kapantay ating buhay, 
mas makulay sa ano mang halaman
lalo't higit sa lumot
huwag sanang iyan ay malimot.