Lawiswis Ng Salita ni P. Nicanor F. Lalog II, ika-26 ng Pebrero 2020
Mula sa Google.
Mierculés de ceniza
araw ng pag-aayuno at abstinensiya
ngunit tila wala nang nagpapahalaga
ni nakaka-alala.
Marahil ay nalimot na nga
at binalewala mga banal na gawain
tuwing cuaresma na nagpapa-alala
kahalgahan ng Diyos higit sa lahat.
Nagtitiis ng gutom
hindi pinapayagang sayaran
ng anumang laman ang tiyan
alang-alang sa kaganapan at kabanalan.
Kaya nga kung titingnan
pag-aayuno ay higit pa sa sakripisyo
na kung saan tiyan ay walang laman
upang magkapuwang Tagapagligtas ng tanan.
Ngayong cuaresma sana iyong mabuksan
puso at kalooban tingnan ano ba kanilang mga laman
baka naman mga wala nang kabuluhan
pabigat lamang sa kalooban.
Bigyan ng puwang upang makapanahan
sa ating puso at kalooban si Kristong maasahan
upang ngayon pa lamang maranasan
hatid ng Diyos na kaligtasan sa mga sa kanya'y mayroong puwang.
Lawiswis ng Salita ni P. Nicanor F. Lalog II, Ika-24 ng Pebrero 2020
Mula sa Inquirer.net
Tuwing maiisip ko pangalang EDSA
ako ay naluluha at naaalala noong una
ang tuwa ng mapayapang pagbabago
nagmula sa makasaysayang kalsada.
Naluluha pa rin ako ngayon
tuwing masasambit pangalang EDSA
ngunit mayroon na parating sumasagitsit
mula sa langit lungkot at pait sa ating sinapit.
Masakit para sa amin na noon pa ma'y
tumutol sa mga ulol at hibang na K-B-L
ngunit pagkaraan ng EDSA,
mga halimaw din pala aming nakasama!
Inuna kanilang mga hacienda
makinarya sa pulitika
reporma anila sa ekonomiya
pagkakanya-kanya lang din naman pala.
Ano nga ba talaga nangyari
noong Pebrero mil-nueve-ochenta'y-sais?
Trahedya ng EDSA o
Trahedya sa EDSA?
Kung maari sana'y pakinggan nating muli
hindi tinig ko o ng kung sinu-sinong
magkomentaryong pilosopo o lalo naman
pinagsasabi ng sino mang pulitiko at relihiyoso!
Bawat isa sana ay magtika
dahil alin mang trahedya - ng EDSA o sa EDSA -
ay iisa: Panginoong Diyos na siyang kumilos noon,
ating tinalikuran at kinalimutan ngayon!
Lawiswis ng Salita ni P. Nicanor F. LaLog II, 18 Pebrero 2020
Larawan kuha ng may-akda sa Mt. St. Paul, Trinidad, Benguet, 05 Pebrero 2020.
Buhat nung isang gabi
hindi ako mapakali
nang si Hesus ay hindi makapagtimpi
napabuntung-hininga ng malalim
nang makipagtalo sa kanya
mga Pariseo humihingi ng tanda
na siya nga ang Kristo.
Hindi ba turo ng matatanda
hanggang ngayon siyang laging paalala
masama magbuntung-hininga
na tila baga wala ka nang pag-asa?
Gayun pa man maski ito ay ating alam
madalas hindi natin mapigilan
kapag nahihirapan at nabibigatan.
Katulad natin marahil
si Hesus napupuno na rin:
nagbubuntung-hininga,
humuhugot ng kabutihan
sa kanyang kaibuturan
upang malampasan
mga kasamaan ng kalaban.
Iyan ang kabutihan
magandang kahulugan
nitong pagbubuntung-hininga
na pilit tinatanggihan, di naman maiwasan
dahil ating nang nakagawian
pumaloob sa kaibuturan
kaysa makipag-awayan
Hindi kaduwagan
bagkus katapangan kung minsan
dahil iyong sinasaalang-alang
katiwasayan ng ating mga ugnayan
kaya pilit sinisisid, sinasaid kabutihan
doon sa kalaliman ng kalooban
kung saan nanahan Panginoon ng Kapayapaan.
Larawan kuha ng may-akda, Poblacion ng Los Baños, Laguna, 13 Pebrero 2020.
Quiet Storm by Fr. Nick F. Lalog II, 04 February 2020
Photo by author, St. Paul Spirituality Center, Mt. Pico, La Trinidad, Benguet, 04 February 2020
My life may be rife
with so many strifes
causing me to struggle,
be pained leading into fruition
making life golden.
When I reviewed my life and see
the past so vast and also fast,
then I realize my life
is not all mine but His, Divine.
Here in my life
I can see within
where it is going;
calming, assuring and so promising
the Divine leading me to final joining
for my life is really in HIM.
Amen.
Photo by author, St. Paul Spirituality Center, Mt. Pico, La Trinidad, Benguet, 04 February 2020
Lawiswis ng Salita ni P. Nicanor F. Lalog II, Ika-28 ng Enero, 2020
Larawan mula “nappyafro”, 27 Enero 2020
Gaya ng karamihan
ako ma'y nagulantang
nang mabalitaan
biglang pagpanaw ni Kobe Bryant.
Hindi makapaniwala
tumutulo mga luha
pilit inuunawa
malagim na balita.
Aking binalikan
kahusayan at kagalingan
nitong si Kobe Bryant
hindi lamang basketball tatak na kanyang iniwan.
Larawan mula sa theplayerstribune.com
Hindi ko maubos maisip noon
nang siya'y paratangan
pang-aabuso ng isang babaeng
kawani ng hotel na kanyang tinuluyan.
Sadyang narumihan kanyang pangalan
kaya't sinikap niyang iyon ay lampasan
pumili ng bagong pangalan - Black Mamba -
taguri sa kanyang katauhan.
Ngunit mga kaguluhan
hindi siya nilayuan
pagkatalo ng kanyang koponan
pati kanyang kasal nalagay sa alangan.
Larawan mula sa we the pvblic.
Ngunit sadyang mahusay lumaro sa buhay itong si Kobe Bryant
kanyang mga salita pinatunayan, pinangatawanan
na ano mang negatibo, kaguluhan o kahirapan
daan at pagkakataon ng pagbangon.
Nang siya ay mamatay
makulimlim daw ang panahon
kadiliman muli siyang sinundan
upang bumangon sa piling na ng Panginoon.
Sa kanyang paglisan wala siyang sinabi ano man
at marahil kaya tayo nasaktan at luhaan
kanyang mga aral ay ginintuang katotohanan
tagos sa ating puso at kalooban.
Larawan mula sa The New Yorker
Pamilya at mga kaibigan
pahalagahan at mahalin ng lubusan
sapagkat itong buhay walang nakaaalam
kung hanggang kailan.
Gayun din naman
sa buong buhay ni Kobe Bryant
malinaw niyang sinabuhay
itong katotohanan:
Sa buhay palaging mayroong kadiliman
ngunit nasa ating mga kamay pagpapasya
kung mananatili sa kapanglawan o
tatahakin landas ng kaliwanagan!
Lawiswis ng Salita ni P. Nicanor F. Lalog II, Ika-09 ng Enero 2020
Hindi pa tapos ang Pasko ngunit iyo na bang napagtanto ano hanap o nais mo sa bagong taong ito?
Tayong lahat ay katulad ng mga Pantas o Mago na naghanap sa Kristo nang sumilang ito noong Pasko.
At iyon ang tunay na karunungan hanapin sa kaitaasan ang kalaliman nitong buhay na sa Diyos lamang matatagpuan.
Mula sa Silangan tinuturing silang puno ng karunungan kalangitan ay palaging tinitingnan ng mga palatandaan sa buhay nagpapayaman.
Kaya kung mga Pantas tutularan tatlong bagay ating kailangan upang tala ay masundan at si Kristo ay matagpuan:
Una'y huwag matakot sa mga kadiliman ng buhay sapagkat mga bituin ay maningning kapag kalangita'y balot sa dilim.
Sa bawat kadiliman ng buhay may pagkakataong binibigay upang makapagdasal at magnilay makagamay direksiyon ng patutunguhan.
Sa pananalangin dinadalisay puso at kalooban upang sarili maialay kapalit ng minimithing makakamit magpapayaman sa katauhan.
Ganito ang takbo nitong ating buhay ano man iyong gusto at hanap hindi basta nakakamit dapat magsumakit.
Ngayon pa lamang sa epipanya ng Panginoon landas ng kanyang kalbaryo at krus agad nang matatagpuan sa siya ring landas na sinundan ng mga Pantas ng Silangan!
Lawiswis ng Salita ni P. Nicanor F. Lalog II, Ika-26 ng Nobyembre 2019
Ang Krus ni Kristo sa tuktok ng simbahan sa Birhen ng Lourdes, France. Larawan ay kuha ng dati kong estudyante si Arch. Philip Santiago noong Setyembre 2018.
Panginoong Hesu Kristo tunay ngang kay dakila mo nang gawin mong trono ng pagkahari itong Krus na pinagpakuan mo.
Kakaiba sa gawi ng mundo pagkahari mo'y pakikiisa sa aming abang pagkatao upang kami'y mahango at makasama sa luwalhati ng pagkabuhay mo.
Sa Krus ikaw ay pumasok sa aming pagkatao; sa Krus mo rin kami'y pinapasok sa iyong kabanalan nang kami'y bahaginan ng iyong pagkabuhay.
Dating sumpang dulot ng kamatayan sa iyong Krus naging pagpapala at ito ay nagsimula nang iyong ipinangako ang Paraiso sa kasamang nakapako.
Itong Krus ni Kristo hindi lamang trono ng kanyang pagkahari kungdi pintuan din patungo sa Paraiso; nawa tantuin ng bawat tao saan mayroong Krus, naroon din si Kristo!
Altar ng Parokya ng San Juan Apostol at Ebanghelista, Bagbaguin, Santa Maria, Bulacan, 17 Nobyembre 2019.
Nasaan na mga liham ng ating mga samahan at pagkakaibigan na ngayo'y napalitan ng maramihang balanang kaisipan at mga larawan pati katatawanan?
Walang umiiral na ugnayan bagkus mga palitan at pasahan na lamang ng sari-saring nararanasan at nararamdaman; mabuti kung iyong masasakyan maski mga kababawan.
Iba pa rin ang karanasang mararamdaman na higit mapagyayaman ng sino mang sumusulat at tumatanggap ng liham mula kay Mister Postman.
Maraming kabutihan at mga kagandahan ginagawa nating usapan sa pamamagitan ng internet kagaya ng e-mail, messenger at viber na sadya namang super ang bilis.
Ngunit kailanman hindi kayang palitan ng mga makabagong pagsusulatan ating kinagawiang mga liham na laging kinasasabikan, inaabangan.
Hindi agad binubuksan mga kamay pinupunasan at baka marumihan mamantsahan tinanggap na liham mula sa kanino man na turing ay isang kaibigan.
Itong pagsusulat maging pagtanggap ng liham maituturing nating ritwal ng ating pagkakaibigan: walang minamadali bawat sandali kinakandili pilit pinanatili sana'y kapiling kang lagi.
Nakakahinayang itong kaugalian ng pagliham napalitan, pati ating pagkakaibigan, mga ugnayan tila nakalimutan; balikan mga lumang liham nasaan hindi ba't nakatago, iniingatan upang basahin, sariwain, palalimin ating samahan?
Lawiswis ng Salita ni P. Nicanor F. Lalog II, Ika-11 ng Nobyembre 2019
Larawan mula sa Google.
Madalas ilarawan itong dakilang kawal ng Diyos si San Martin ng Tours sa France hinahati kanyang kapa upang bihisan dukhang matanda nakasalubong sa daan.
Kinagabihan kanyang napanaginipan Panginoong Hesus sa kanyang paanan tangan-tangan kapang ipinahiram sa matandang tinulungan.
Ito ang katuparan ng Ebanghelyong sa atin ibinalita mismo ni Hesus na ano man ang ating gawin sa kapwa natin siyang ginagawa din natin sa kanyang Panginoon natin.
Kapilya ng Santisimo Sakramento sa UP-Diliman. Kuha ni Bb. JJ Jimeno ng GMA7 News, 2019.
Kay gandang pagnilayan isa pang aral nitong kapa ni Martin na Banal: lingid sa kaalaman ng karamihan, dito rin nagmula kataga ng pook na munting dasalan.
Sinasabi sa kasaysayan, noong bagong Kristiyano si Martin kanyang iniiwan mga tauhan para manalangin sa kagubatan; hinuhubad kanyang kapa upang makapanalangin ng taimtiman.
Kaya tuwing siya ay hahanapin, tanging tutuntunin saan nakasampay o nakalagay hinubad niyang kapa, na kanilang tinuring sa wikang Frances na "chapelle" na naging chapel, o kapilya sa wika natin.
Ang “Ecce Homo” ni Murillo. Larawan mula sa Google.
Hindi ba natin pansin itong Panginoong Hesus natin nang siya ay dumating sa atin hinubad kanyang pagkadiyos upang makatulad natin, matubos sa mga pagkakasala natin?
Hari ng mga hari, tunay na makapangyarihan ngunit nang nilibak sinuutan ng purpurang kapa, pinutungan ng koronang tinik at hindi umimik hanggang makamit kaligtasan natin.
Kay sarap pagbulaybulayan halimbawang iniwan sa atin nitong si San Martin: ating kapa ng kapangyarihan at pangalan ating hubarin upang ang Diyos ay ating makamit at siya ay makatulad natin.
lordmychef.com 