Lawiswis ng Salita ni P. Nicanor F. Lalog II, Ika-13 ng Agosto 2019
Larawan mula sa GMA News.
Bata pa lamang ako hindi ko na gusto ang buwan ng Agosto bago pa mauso tawag nila dito na buwan ng mga multo.
Nasa grade two ako nagtataka na ako bakit tuwing Agosto mabagal takbo ang panahon?
Ito ang bumaon sa murang isipan ko noon kaya hanggang ngayon hirap ako na umahon na tila baga nilalamon at nilalason ng karanasan kahapon.
Nagkataon lang ba nitong ilang taon bakit nagkagayon takbo ng buhay ko sa ngayon tuwing Agosto nagkakapatong-patong mga hindi mabubuting sitwasyon, lihis sa mga nilalayon?
Parang katulad ng lagay ng panahon mapanglaw ang kalangitan bumubuhos malakas na ulan parang walang katapusan katulad ng aking mga luha sa mga tao na di ko malaman kung kaibigan.
Kung minsan maiisip ko hindi lang buwan ng multo ang Agosto kungdi pati ng impakto at demonyo dahil kung titingnan ko ano ba ito, matapos lunurin tayo ng ulan saka naman sisikat matinding init ng araw?!
Iyan daw ang dahilan kaya maraming sakit sa katawan hanggang kasu-kasuan lagay ng panahon hindi maintindihan sala sa init, sala sa lamig parang mga tao sa paligid walang paninindigan, kay daling mang-iwan.
Bawat araw ng ating buhay ay pagpapalang kaloob ng Diyos nating mabuting-loob ngunit kung minsa'y nakakasama ng loob kapag tila lahat ay nakataob at ika'y nakasubsob.
Aking lang inaasahan at pinanaligan pagkatapos ng tag-ulan, doon mga dahon ay luntian sa bawat unos na dumaraan, nasusubok katatagan ng halaman mabalian man ng sanga o malagasan ng bunga naiiiba na siya at lalong gumaganda sapagka't sa bawat pagkakataon at panahon, Diyos ay naroon.
Larawan ay kuha ni G. Howie Severino ng GMA News sa Taal, Batangas, Nobyembre 2018.
Tinuturing siyang banal at makapangyarihan Tinutulad sa Panginoong kanyang pinaglilingkuran Kaya madalas kanyang nalilimutan Siya ma'y tao na mahina at makasalanan.
Pinili mula sa karamihan Hindi dahil sa pambihirang katangian Maliban sa kabutihan ng Panginoong sinusundan Siya ay pinag-uubra lamang.
Ikaw pari ay alagad ni Kristo Hindi ikaw ang Kristo Kaya huwag kang malilito Maski ika'y naka-abito, hindi ikaw ang sasambahin ng tao!
Dumapa, nagpapakumbaba, at sumumpa Buong buhay ilalaan, puso walang ibang laman Kungdi si Kristo ang tanging yaman Hindi tawag ng laman o ng sanlibutan.
Pangakong ipagdiriwang mga sakramento Tinatalikuran kung wala o maliit matatangap na istipendo; Umoo na ipapahayag at isasabuhay salita ng Diyos Ngunit sa pulpito parang loro Mga komentaryo sa radyo at peryodiko ang kabisado.
Hindi nag-aasawa upang mamuhay kaisa si Kristo Magiging masunurin, mamumuhay ng payak Ngunit sa kanyang mga gayak agad matitiyak Maraming layak: kungdi babae, lalake na kunwa'y palaki O dili kaya'y ampon na kamukha naman paglaki!
Mula sa Google.
Ano ang nangyari at tila kaluluwa'y ipinagbili Pari naging makasarili, puri sinasantabi Sinasanto lamang kanyang sarili Bawat utos hindi nababali, bawat naisin naikakatwiran?
Itong ating pintakasi ang nagsabi Ang pari ay paalala ng Krus na siya ring ating hugis; Alin lamang sa dalawa ang maaring mangyari: Ika'y buong-buo sa Diyos o ika'y buong-buo sa sanlibutan?
Huwag nating kalilimutan, higit sa "tawag" ng pagpapari Ay ang "tumatawag" sa ating Punong Pari: Ika'y pari ni Kristo, hindi artista na kailangan ng gluta; Sapat na ang maging pari ni Kristo, hindi kailangan ng monumento; Higit sa lahat, hindi tayo ang aalalahanin ni gagayahin Kungdi si Hesus na Panginoong natin.
Kayong mga madla, huwag ninyo kaming sambahin Sapat na kami'y bigyan ng malamig na inumin, Tanggapin, at higit sa lahat, ipanalangin; Sapagkat kung tutuusin, kaming mga pari ay katulad ninyo rin Mga aliping walang kabuluhan na tumutupad lamang sa tungkulin (Lukas 17:10)!
Lawiswis ng Salita ni P. Nicanor F. Lalog II, ika-29 ng Hulyo 2019
Minsan sa aking pananalangin Sa Panginoon ako'y dumaing Ngunit ang sumagi sa akin Yaring tagpo nang kanyang sabihin:
"Marta, Marta naliligalig ka At abalang-abala sa maraming bagay Ngunit iisa lamang ang talagang mahalaga."
Kaya naman naglaro sa aking isipan Paano mangatwiran si Marta kung tayo sinabihan At marahil ganito kanyang tinuran: "Ako pa ba ngayon ang naliligalig Gayong batid ninyo Panginoon Pandarambong at kasakiman ng karamihan Pagkagahaman sa kayamanan ng ilan Habang kaming maliliit ang labis nahihirapan?"
At waring sumagi sa akin wika ng Panginoon, "Marta, Marta iisa lang ang mahalaga: Sa akin ay manalig ka sapagkat sinabi ko na, Mapapalad ang mga aba at dukha Na walang inaasahan kungdi ang Diyos."
Napahupa aking kalooban samandali Ngunit muli nag-alimpuyo aking galit at ngitngit Aking naisip isa pang hirit ni Marta Nang sa kanya'y nasambit: "Ako pa ba ngayon Panginoon ang nababahala At tila hindi mo alintana mga ginagawa ng masasama Na parang sila pa yata ang pinagpapala Pinapalakpakan, hinahangaan ng karamihan?"
At yaring sumagi muli ang wika ng Panginoon, "Marta, Marta isa lang ang kailangan kaya matuwa ka Kung dahil sa akin ika'y inaalimura, inuusig Pinagwiwikaan ng mga kasinungalingan: walang natatago Na di malalantad, walang lihim na hindi malalaman at mabubunyag."
Sa iyo ginigiliw kong kaibigan Nabibigatan sa maraming pinapasan Nahihirapan sa mga pinagdaraanan Laging tandaan si Kristo lamang ating kailangan.
Katulad ni Santa Martang uliran Tanging si Hesus ang asahan at abangan Ipagpatuloy gawang kabutihan Iyong pangarap tiyak makakamtan!
Lawiswis ng Salita ni P. Nicanor F. Lalog II, 20 Hulyo 2019
Mula sa Google.
Noong ako'y bata pa Aking pinagtataka Bakit "mabait" ang tawag ni Ina Sa mga daga?
Ngayong ako'y matanda na Aking napagtanto ganyan din mga tao Tinuturing nating mababait Parang bubwit kahit maliit ay buwisit.
Mabait daw ang tahimik at walang imik Mga salitang sinasambit suwabe at walang sabit Ngunit kung makapanlait Malalasap pait ng kanilang pag-iisip.
Bulang-gugo kanilang mga kamay sa pagdamay Hindi nakikipag-away kaya ating palagay Sila'y makakasabay at laging aalalay Ngunit sa paninindigan sila'y sablay.
Iyan ang malaking kaibahan ng mabuting tao: May paninindigan kaya laging nakikipaglaban Para sa katotohanan, katarungan, at kabutihan Magalit ka man o sino pa man.
Sigurado sa sarili ang taong mabuti Hindi nagpapadala sa mga sabi-sabi May busilak kanyang puso at kalooban Kung saan nananahan katarungan at pagmamahal.
Ang bait ng tao naroon sa kanyang isipan Ngunit hindi sapat kung talino lamang ating sasandigan Sapagkat maraming katotohanan Na tanging puso lamang ang nakatatalos.
Si Hesus na tanging Mabuti ang nagsabi Mapapalad ang mayroong malinis na puso At makikita nila ang Diyos Dahil silang mabubuti ang handang mapako sa krus.
Lawiswis ng Salita ni P. Nicanor F. Lalog II, ika-18 ng Hulyo 2019
Tuwing tag-ulan Aking binabalikan Paliligo sa ulan Noong aking kamusmusan.
Bakit nga ba sa ating katandaan Hindi na tayo makapaligo sa ulan? Dala ba ng makabagong panahon At iba na ang ating laruan at kasiyahan?
Tayo nga ba ay maselan Dahil marumi na ang ulan? Hindi ba ito ay ating kagagawan Winasak natin magandang kalikasan?
Aking pinaka-iibig kapag umuulan Tubig mula sa kalangitan, pinakikilig aking kaibuturan Bibig dinidilig, pisngi'y dinadampian Habang mukha'y nakatingala kay Bathala.
Ito ang kagandahan at kabutihan Ng paliligo sa ulan Muli nating nararamdaman ating kalikasan Ganan ng ating katauhan.
Nagbabadyang ulan, kay sarap pagmasdan. Aking inaasam-asam, paliligo sa ulan sana’y maisakatuparan!
Lawiswis ng Salita ni P. Nicanor F. Lalog II, Ika-10 ng Hulyo 2019
Lumang kalsada, may 300 taon bago sinilang si Kristo, patungong Petra sa Jordan. Larawan kuha ng may akda noong 01 Mayo 2019.
Matagal ko nang napatunayan Na totoo nga ang kasabihang Isang paglalakbay itong buhay; Ngunit nitong kamakailan lamang Aking napagnilayan ang higit na katotohanan.
Higit na mahalagang malaman Hindi ang landas na daraanan Na wala namang nakakaalam Kungdi sino ang yaring kasamang Makakasabay na aagapay at aalalay.
Tunay nga na isang paglalakbay ang buhay Ngunit hindi ito isang destinasyon na patutunguhan Kungdi isang direksiyon na dapat sundan Kaya ang tinuran ni Hesus noong Huling Hapunan "Ako ang daan at ang katotohanan at ang buhay".
Maaring maraming lugar tayong narating At marahil marami pa ang mararating Ngunit kung hindi nababago pagkatao natin Para din tayong hindi umalis at walang narating Bagkus nanatili dahil mag-isa pa rin.
Paglalakbay palabas ng sarili ang buhay Sapagkat ang hinahanap nating katuturan at kahulugan, Kailanma'y hindi matatagpuan sa ating sarili lamang O saanmang lunan kungdi sa mukha ng bawat kapwa Na katulad at kapatid natin sa yaring buhay paglalakbay.
Larawan ay kuha ni John Bonding ng Architecture & Design Magazine, 25 Mayo 2019. Mula sa Facebook.
Lawiswis ng Salita ni P. Nicanor F. Lalog II, Ika-09 ng Hulyo 2019
Imahen ng Inmaculada Concepcion sa tuktok ng kampanaryo ng Katedral ng Malolos. Larawan kuha ni Lorenzo Atienza, 12 Hunyo 2019.
Nakakagulat, nakakagimbal Marami ang nagulantang Sa balitang napakinggan Lalawigan ng Bulakan Number one ngayon sa patayan.
Kadluan ng katagalugan Na siyang wika ng mga makata Dito sa Bulakan iba na yata sinasalita: Tokhang na mula sa Bisaya Nawala na ang puso sa pananalita pati sa gawa.
Nasaan mga namumuno ng pamahalaan at Simbahan Paano nagkaganyan itong duyan ng kasaysayan Naging bukirin ng patayan Nang hindi namamalayan o Dahil wala tayong pakialam?
Noon pa mang makalawang taon Pinakamaraming natokhang noong linggo ng Bulakan Natabunan lamang ng balitang pagpatay Ng mga pulis sa walang kamalay-malay na kabataan Kian kanyang pangalan doon sa Kalookan.
Pansamantalang tumigil mga patayan Kinasuhan mga berdugo ni Kian Ngunit kanilang hepe sa Kalookan Binigyan ng pabuya upang pamunuan Pulisya sa buong lalawigan ng Bulakan.
Ano na nga ba nangyari sa atin, mga kababayan? Di lamang nanunungkulan kungdi pati mga mamamayan Wala na ba tayong pakialam Mga dating luntiang sakahan ay tinambakan Upang gawing paradahan ng mga container van?
Bago pa dumating ang tokhang Pinatay na rin mga ilog at sapa natin Kaya maraming lupain naging dagat-dagatan na rin Habang hinahayaan nating gahasain Bulubundukin ng Sierra Madre upang samsamin kayamanan natin.
Nawala na yata pasintabi Pati mga simbahan ginigiba, iniiba Kabanalan hinalinhan ng kaartehan Diyos hindi ni makita o maramdaman Puro palabas, nawala na napapaloob na kahulugan.
Halina at magsuri, magmuni-muni Ating pagbulayan kahulugan nitong buhay Matatagpuan kung ano ating niyuyungyungan Madalas siya rin nating pinahahalagahan At tiyak naroon din ating kayamanan.
Mabuting Pastol, kaawaan at kalingain aming lalawigan na tila pinabayaan ng iyong mga pinagkatiwalaan! Larawan ng luklukan ng Katedral ng Malolos. Kuha ni Lorenzo Atienza, 12 Hunyo 2019.
Lawiswis ng Salita ni P. Nicanor F. Lalog II, Ika-28 ng Hunyo 2019
Mga pinagbibiling isda sa Dampa, Macapagal Blvd., Lungsod Pasay. Larawan kuha ng may akda ng tula, Nobyembre 2017.
Ang sabi ng mga matatanda Sa bibig nahuhuli ang isda Kaya sa bawat salita makikita Pagkatao ng nagsasalita.
Karunungan at kamangmangan Katapatan at kasinungalingan Tiyak malalaman kapag napakinggan Pinagsasasabi ng sino man.
Itong ating pamahalaan Sadyang puro kabalastugan nalalaman Walang pakialam sa kanyang mga mamamayan Nalantad na katotohanan kamakailan.
Kuha ng may akda sa Dampa ng Macapagal Blvd., Nobyembre 2017.
Sadyang totoo itong ating kawikaan Di lamang sa bibig nahuhuli ang isda Kungdi yaong taong puro dada Kadalasa'y siya ring kulang sa gawa.
Kung ang isda ay sa bibig nga nahuhuli At sila'y makapagsasalita Tiyak may katuturan at kahulugan Kanilang mga pinag-uusapan.
Una nilang liliwanagin Lalo ng mga galunggong at ayungin Hindi sila gunggong tulad nating may nasyon Sabihin sa payasong Senador mahilig magmarunong.
Marahil magsasalita rin mga isdang biya Madalas nating minamaliit at sinasabing Utak biya yaong mahihina gayong silang magagaling Kaya lang sabihin pangungutya at panghihiya.
Mga isda sa Dampa sa Macapagal Blvd., Pasay, Nobyembre 2017.
Hindi ba ninyo pansin karangalan at kahihiyan Mayroon itong mga isda kesa atin? Masansang at malansang tingnan at pakinggan Mga nasa Malakanyang sa mga salitang walang katuturan.
Huling huli na sa kanilang bibig Kahit anong kabig, mga salita'y hindi kaibig-ibig Sariling mamamayan at karagatan Mga kayamanang dapat ingatan, kanilang pinababayaan.
Napaka saklap naman nitong kapalaran Ng ating Inang Bayan: una'y salot ng tokhang Nang tayo'y sukat na magising at maraming buhay inagaw sa atin Pati ba naman karagatan at mga isda ay hindi na rin sa atin?
Lawiswis ng Salita ni P. Nicanor F. Lalog II, Ika-21 ng Hunyo 2019
Larawan mula sa Google.
Tinanong sila ni Hesus, “Hindi pa ba ninyo nababasa ang talatang ito sa Kasulatan? ‘Ang batong itinakwil ng mga tagapagtayo ng bahay Ang siyang naging batong panulukan. Ginawa ito ng Panginoon, At ito’y kahanga-hanga!'”
Mateo 21:42
Madalas sa ating buhay Tayo'y nanamlay sa maraming Dagok at kabiguan At ating nalilimutan itong katotohanan:
Kagandahan at kabutihan Ng Diyos sa ating nagmamahal Kanya tayong sinasamahan Kung saan hindi nating siya inaasahan.
Pangunahin niyang katangia'y Magtago at magkubli sa mga tabi-tabi Na sa tingin nati'y mga walang silbi Sa pag-aakala nating Diyos ay naroon lang sa malalaki.
Kaya nang Siya ay magkatawang-tao Hindi siya dumating na malaki Kungdi sinilang na munting baby Inaruga at pinalaki.
Nang si Hesus ay magsimulang magsilbi Doon siya natagpuan sa mga tabi-tabi Humirang mga lalaki na wala namang sinabi At nakisama sa mabababang uri ng babai.
Larawan mula sa Rappler sa pamamagitan ng Google.
Kaya kung ang buhay ay isang laro Natitiyak ko paborito sa lahat ni Kristo Ang taguang pung at hindi patintero Lalo nang hindi ang tumbang preso.
Pag masdan ninyo nang matanto: Abalang-abala tayo sa paghahanap Ng kung anu-anong natatago Gayong tayo naman ang nabuburo.
Palaging taya, palaging kawawa; At kung minsan nama'y nadaraya. Kaya kung si Hesus ay iyong matagpuan at... Pung! Siya na ang taya, ikaw ang malaya.
Lawiswis ng Salita ni P. Nicanor F. Lalog II, Ika-19 ng Hunyo 2019
Larawan mula sa Google.
Bakit ang panahon ng tag-araw at tag-ulan Hinihintay pa ngayon deklarasyon ng PAGASA Hindi pa ba sapat nakikita Basang-basa ka na ng pawis o ng ulan?
Bakit tayo naaaligaga kapag inabuso Aso't pusa at iba pang mga alaga Pero paglapastangan sa kapwa Wala naman tayong ginagawa?
Bakit mga durugistang maralita Tanging nababalitang napapatay Habang susuray-suray, pakaway-kaway Mga nakaririwasang high na high?
Bakit ngayon tikom mga bibig nila Nasaan mga matatapang na salita Nang binangga ang bangka ng mangingisda Sa sariling karagatan at sukat iniwanan?
Bakit kapag mga maliliit nagigipit Lalo pang nalalait sa salitang masasakit Ng mga pinunong mata'y nakapikit, takot sumabit Nakakibit-balikat, dahil wala namang paki?
Bakit nga ba sa ating panahon ngayon Na wala nang hindi nalalaman Lahat puro salitaang walang pinatutungahan Katulad ay balde, maingay at walang laman kasi!
Bakit lahat puro sagot at paliwanag Walang nagtatanong Gayong nakikilala ang tunay na marunong Sa kanyang uri ng pagtatanong.
Larawan kuha ni Dra. Mai Dela Pena sa Tokyo, Japan noong Marso 2018.
lordmychef.com 