Lawiswis ng Salita ni P. Nicanor F. Lalog II, Ika-09 ng Hulyo 2019
Imahen ng Inmaculada Concepcion sa tuktok ng kampanaryo ng Katedral ng Malolos. Larawan kuha ni Lorenzo Atienza, 12 Hunyo 2019.
Nakakagulat, nakakagimbal Marami ang nagulantang Sa balitang napakinggan Lalawigan ng Bulakan Number one ngayon sa patayan.
Kadluan ng katagalugan Na siyang wika ng mga makata Dito sa Bulakan iba na yata sinasalita: Tokhang na mula sa Bisaya Nawala na ang puso sa pananalita pati sa gawa.
Nasaan mga namumuno ng pamahalaan at Simbahan Paano nagkaganyan itong duyan ng kasaysayan Naging bukirin ng patayan Nang hindi namamalayan o Dahil wala tayong pakialam?
Noon pa mang makalawang taon Pinakamaraming natokhang noong linggo ng Bulakan Natabunan lamang ng balitang pagpatay Ng mga pulis sa walang kamalay-malay na kabataan Kian kanyang pangalan doon sa Kalookan.
Pansamantalang tumigil mga patayan Kinasuhan mga berdugo ni Kian Ngunit kanilang hepe sa Kalookan Binigyan ng pabuya upang pamunuan Pulisya sa buong lalawigan ng Bulakan.
Ano na nga ba nangyari sa atin, mga kababayan? Di lamang nanunungkulan kungdi pati mga mamamayan Wala na ba tayong pakialam Mga dating luntiang sakahan ay tinambakan Upang gawing paradahan ng mga container van?
Bago pa dumating ang tokhang Pinatay na rin mga ilog at sapa natin Kaya maraming lupain naging dagat-dagatan na rin Habang hinahayaan nating gahasain Bulubundukin ng Sierra Madre upang samsamin kayamanan natin.
Nawala na yata pasintabi Pati mga simbahan ginigiba, iniiba Kabanalan hinalinhan ng kaartehan Diyos hindi ni makita o maramdaman Puro palabas, nawala na napapaloob na kahulugan.
Halina at magsuri, magmuni-muni Ating pagbulayan kahulugan nitong buhay Matatagpuan kung ano ating niyuyungyungan Madalas siya rin nating pinahahalagahan At tiyak naroon din ating kayamanan.
Mabuting Pastol, kaawaan at kalingain aming lalawigan na tila pinabayaan ng iyong mga pinagkatiwalaan! Larawan ng luklukan ng Katedral ng Malolos. Kuha ni Lorenzo Atienza, 12 Hunyo 2019.
Lawiswis ng Salita ni P. Nicanor F. Lalog II, Ika-21 ng Hunyo 2019
Larawan mula sa Google.
Tinanong sila ni Hesus, “Hindi pa ba ninyo nababasa ang talatang ito sa Kasulatan? ‘Ang batong itinakwil ng mga tagapagtayo ng bahay Ang siyang naging batong panulukan. Ginawa ito ng Panginoon, At ito’y kahanga-hanga!'”
Mateo 21:42
Madalas sa ating buhay Tayo'y nanamlay sa maraming Dagok at kabiguan At ating nalilimutan itong katotohanan:
Kagandahan at kabutihan Ng Diyos sa ating nagmamahal Kanya tayong sinasamahan Kung saan hindi nating siya inaasahan.
Pangunahin niyang katangia'y Magtago at magkubli sa mga tabi-tabi Na sa tingin nati'y mga walang silbi Sa pag-aakala nating Diyos ay naroon lang sa malalaki.
Kaya nang Siya ay magkatawang-tao Hindi siya dumating na malaki Kungdi sinilang na munting baby Inaruga at pinalaki.
Nang si Hesus ay magsimulang magsilbi Doon siya natagpuan sa mga tabi-tabi Humirang mga lalaki na wala namang sinabi At nakisama sa mabababang uri ng babai.
Larawan mula sa Rappler sa pamamagitan ng Google.
Kaya kung ang buhay ay isang laro Natitiyak ko paborito sa lahat ni Kristo Ang taguang pung at hindi patintero Lalo nang hindi ang tumbang preso.
Pag masdan ninyo nang matanto: Abalang-abala tayo sa paghahanap Ng kung anu-anong natatago Gayong tayo naman ang nabuburo.
Palaging taya, palaging kawawa; At kung minsan nama'y nadaraya. Kaya kung si Hesus ay iyong matagpuan at... Pung! Siya na ang taya, ikaw ang malaya.
Lawiswis ng Salita ni P. Nicanor F. Lalog II, Ika-19 ng Hunyo 2019
Larawan mula sa Google.
Bakit ang panahon ng tag-araw at tag-ulan Hinihintay pa ngayon deklarasyon ng PAGASA Hindi pa ba sapat nakikita Basang-basa ka na ng pawis o ng ulan?
Bakit tayo naaaligaga kapag inabuso Aso't pusa at iba pang mga alaga Pero paglapastangan sa kapwa Wala naman tayong ginagawa?
Bakit mga durugistang maralita Tanging nababalitang napapatay Habang susuray-suray, pakaway-kaway Mga nakaririwasang high na high?
Bakit ngayon tikom mga bibig nila Nasaan mga matatapang na salita Nang binangga ang bangka ng mangingisda Sa sariling karagatan at sukat iniwanan?
Bakit kapag mga maliliit nagigipit Lalo pang nalalait sa salitang masasakit Ng mga pinunong mata'y nakapikit, takot sumabit Nakakibit-balikat, dahil wala namang paki?
Bakit nga ba sa ating panahon ngayon Na wala nang hindi nalalaman Lahat puro salitaang walang pinatutungahan Katulad ay balde, maingay at walang laman kasi!
Bakit lahat puro sagot at paliwanag Walang nagtatanong Gayong nakikilala ang tunay na marunong Sa kanyang uri ng pagtatanong.
Larawan kuha ni Dra. Mai Dela Pena sa Tokyo, Japan noong Marso 2018.
Lawiswis ng Salita ni P. Nicanor F. Lalog II, ika-14 ng Hunyo 2019
Mula sa Google.
Mula pagkabata hanggang pagtanda Ikaw na San Antonio aming nagisnan Tinatawagan nang matagpuan Ano mang nawawala o naiwan saan-saan.
Minamahal naming pintakasi Tulungan nawa kami sapagkat dumarami At lalong lumalaki aming mga isinasantabi Na maski mawala tila wala kaming paki!
Kami'y nagagalit kapag nawawaglit Mga mumunting gamit at anik-anik Pinalalaki para nang buong sarili inapi Ngunit kaunting buti para sa katabi kinukubli?
Hindi kami mapakali at agad bibili Kapag nawala'y gamit na kawili-wili Ano't lagi naming hanap ay aliw at kaluguran Walang pakialam sa mga tiyan na kumakalam?
Nawawala na respeto at pag-galang Pati hinhin at kahihiyan di malaman kung nasaan Kinamimihasnan kalaswaan at kasalahulaan Mas hinahanap kasamaan kaysa kabutihan?
Sana kami'y iyong tulungan Muli naming matagpuan Daang pabalik sa Kabanal-Banalan Na palagi naming tinatalikuran at iniiwanan.
Kami po ang nagkulang Ni hindi na namin Siya namamasdan Wala na kaming nilalaang panahon Upang Siya ay dasalan.
Mahal naming patron sa amin lumingon Nawawala kami sa landas ng Panginoon Unti-unting nilalamon ng aming kapalaluan Nalulunod sa kayamanan, karangyaan, at kapangyarihan.
Kami ang nawawala, di namin alintana Buhay at kapwa amin nang binabalewala Poong Maykapal amin nang tinalikuran Gayon Siya ang aming uuwian at hahantungan.
Lawiswis ng Salita ni P. Nicanor F. Lalog II, Ika-12 ng Hunyo 2019
Mula google.
Tuwing sasapit petsa dose ng Hunyo Problema sa ating mga Filipino Nahahayag sa pagdiriwang na ito Na tila hindi natin tanto kahulugan nito.
Ano nga ba ang wasto, Araw ng kalayaan o araw ng kasarinlan? Parehong totoo at magkahawig sinasaad ng mga ito Ngunit malalim at malaki pagkakaiba mga ugat nito.
Mula sa Wikipedia.
Kung pagbabatayan ating kasaysayan Araw ng kasarinlan ang petsang ito Nang bumukod at magsarili tayo bilang isang bansa Pinatatakbo ng mga sariling mamamayan at kababayan.
Ngunit totoo rin namang sabihing Higit pa sa kasarinlan natamo natin sa petsang ito Kaya nararapat tawaging araw ng kalayaan Nang lumaya ating Inang Bayan sa pang-aalipin ng mga dayuhan.
Larawan mula sa ABS-CBN News.
Maituturing bang may kasarinlan ating bayan Kung wala namang kalayaan linangin at pakinabangan Kanyang likas na yaman lalo na sa karagatan Gayong tayo ay bansang binubuo ng mga kapuluan?
Tayo nga ba ay nagsasarili at masasabing may kasarinlan Kung turing sa atin ay dayuhan sa sariling bayan Walang matirhan lalo na mga maliliit nating kababayan Dahil sa kasakiman ng ilang makapangyarihan sa pagkamkam?
Gayon din naman sana'y ating matingnan Kung tunay itong ating kalayaan Marami pa rin ang nabubulagan at hindi matagpuan Dangal ng kapwa na madalas ay tinatapakan.
Ang tunay na kalayaan ay ang piliin at gawi'y kabutihan Kaya ito ma'y kasarinlan dahil ito'y kakayahang Kumawala at lumaya sa panunupil sa sariling pagpapasya Walang impluwensiya ng iba kungdi dikta ng konsiyensiya.
Larawan mula sa Google.
Kalayaan at kasarinlan kung ating pagninilayan Dalawang katotohanang nagsasalapungan Kung saan mayroong pagtatagpo ng kabutihan Paglago at pagyabong ng buhay tiyak matatagpuan.
Lawiswis ng Salita ni P. Nicanor F. Lalog II, Ika-3 ng Hunyo 2019
Larawan mula sa Google.
Noong si Hesus ay nilitis Ni Pilato na tingin sa kanya'y malinis, Ano aniya ang katotohanan Na hanggang ngayon ating tinatanong Sa Panginoong lagi nating hinahamon.
Sayang noon ay hindi tumugon Itong Panginoon sa naturang tanong Upang sana'y maliwanag na sa ating ngayon Kahulugan ng katotohan na palaging naaayon Sa kanya-kanya at sariling interpretasyon.
Ngunit kung ating paglilimi-limihan Hindi sinagot ng Panginoon si Pilato noon Dahil mali ang kanyang tanong: hindo "ano" Kungdi "nasaan" ang katotohanan upang kapag natunton Ito'y maisasabuhay natin sa lahat ng pagkakataon.
Mismong ang Panginoon nagsabi noon Na siya ang daan, ang katotohanan, at ang buhay; Alalaong-baga, itong katotohanan ay isang "person" Kaya naman ang pagsuri sa katotohanan Masasalalay palagi sa pagpapahalaga natin sa buhay.
Umiiral lamang ang kasinungalingan Na siyang kabaligtaran ng katotohanan Kapag katauhan ng kapwa hindi natin pinahahalagahan, Binabale-wala at isinasantabi dangal ng kapwa Kaya lahat ng masasabi ay malayo sa laman ng budhi.
Kung sisikapin lamang natin Mapahalagahan bawat kapwa natin Hindi tayo magsisinungaling o magmamagaling Dahil maliwanag di lamang sa isipan natin Yaring katotohanang nananahan sa puso natin.
Lawiswis ng Salita ni P. Nicanor F. Lalog, ika-27 ng Mayo 2019
Larawan mula sa Google.
Ipagpaumanhin kahit ako'y hindi naman mahinhin Bakit tila baga tayo ay nahuhumaling sa mga usapin At paksang karimarimarim kung saa'y Kalaswaan nagiging isang katatawanan?
Hindi lamang minsan kungdi kadalasan Ito na nga yata katauhan ng mama sa Malakanyang Na kung hindi kasinungalingan o kalokohan Kasalahulaan at kalaswaan laging binibitiwan.
Kailanman ay hindi katatawanan Gawing biro lamang o paksa sa usapan Na wala namang katuturan Panghahalay sa kababaihan.
Larawan mula sa Google.
Simula't sapul palagi na lamang Kababaihan tampulan ng mga panlalait at sisihan Na tila baga walang kasalanan Mga kalalakihan sakdal sa kalinisan at kahusayan.
Madalas hindi nalalaman ng kalalakihan Hinugot ang babae sa kanyang tadyang Hindi lamang upang siya ay ingatan at pangalagaan Kungdi dahil kapantay sa dangal at katauhan.
Sa lahat ng paglapastangan sa kababaihan Panghahalay ang kasukdulan Dahil niyuyurakan sinapupunan Na siyang pinanggalingan ng sangkatauhan.
Larawan mula sa Google.
Napakinggan mo na ba Daing na hindi maisigaw o maibulalas Ng isang hinalay, lalo na yaong nag-alay ng buhay Upang mamasukan sa ibang bansa?
Nakita mo na ba mga mata na hindi makatingin Ulo ay nakatungo dahil sa bangungot na hindi magising Luha hindi mapahirin sa bigat at sakit ng damdamin Ng isang babaeng hinalay o puri'y nadungisan?
Aynakupo...! Nag-aalimpuyong galit kasabay Ang pait at sakit sa tiyan at dibdib Na halos ika'y mabuwal at maduwal Sa gayong sinapit na dama pa rin ang sakit.
Ang pinakamalupit kapag babae ay hinalay Ay iyong mapagtanto na isa itong impakto Nagkukubli sa inapi na maaring babaeng iyong itinatangi: Sariling ina o asawa, kapatid o anak.
Kapag kalaswaan ay nagiging isang katatawanan Dangal ng katauhan di lamang ng kababaihan Ang hindi na pinahahalagahan hanggang maubos ang halakhakan Dahil mga tao'y magsasakmalan na parang mga hayop na lamang.
Estatwa ni Maria nang dalawin niya si Elizabeth sa kaburulan ng Judea; mula sa kanilang sinapupunan sumilang ating kaligtasang hatid ni Hesus na inihanda ni Juan Bautista. Dalawang kababaihan kumakatawan sa kadakilaan at karangalan ng mga babae sa ating buhay: ina, asawa, kapatid, anak, at kaibigan. Larawan ng may-akda, Abril 2017.
Lawiswis ng Salita ni P. Nicanor F. Lalog II, Ika-20 ng Abril 2019
Larawan mula sa Google.
Ano nga ba ang kabuluhan Nitong mga panata na sinasakatuparan Kung wala namang kahulugan Maliban sa ito'y nakagisnan?
Inyong pagmasdan itong ating mga nakagawian Na pawang puro kaluhuan Puro palabas wala na sa kalooban Kaya nawala na sa atin ang kahulugan.
Pagkakataon sana upang ating masalamin At mapaglalim mga minanang kaugalian natin Ngunit nagiging isang malagim na tanawin Karima-rimarim na pag-uugali ng marami sa atin.
Larawan mula sa GMA News.
Isang kabataan nadismaya sa nakita Nang gawing malaking basurahan simbahan nila Ng mga nag-visita iglesia na walang pakundangan Nilapastangan at sinalaula tahanan ng Diyos.
Hindi lamang iyan sa Antipolo Kungdi maging mula Aparrri hanggang Jolo Eksenang ganyang kagulo Ng mga Katolikong sira ang ulo.
Larawan mula sa Google.
Anong uri nga ba ng pananampalatay mayroon tayo Mga Filipino diumano Katoliko sarado Hindi mababago anila pagiging Kristiyano O sarado isip at puso sa katotohanan ni Kristo?
Ngayong "nakahimlay" Panginoon natin Suriin mga pagkukulang natin Kung bakit mga pagdiriwang at gawain Sa simbahan nawalan ng taginting.
Mga simbahan ba natin maituturing na bahay dalanginan pa rin Kung punung-puno ng mga palamuti, walang katapusang mga pagawain? Puro flat screen at tarpaulin mga dingding Lahat na lamang naka-recording, ang Diyos wala nang dating.
Nasaan na ang marubdob na pakiramdam Kung ang simbahan mistulang tindahan At ang masaklap na katotohanan minsan o palagian Kay Father walang maramdamang kabanalan.
Madalas nating mapakinggan itong kasabihan Kung ano ang gobyerno, ganoon din ang mga tao; Huwag nating kalilimutan ang katotohanang iyan Sa simbahan ma'y matatagpuan una doon sa mga kaparian.
Lawiswis ng Salita ni P. Nicanor F. Lalog II, ika-16 ng Abril 2019
Ngayong Semana Santa aking naalala Aking nabasa isang tunay na istorya Tungkol kay Santa Mother Teresa Noong nabubuhay pa siya sa Calcutta.
Minsan daw isang alaga nilang kulang-kulang Sinidlang bigla ng galit na di maintindihan Krusipihiyo sa dingding nabalingan ng pansin Ibinato sa Santa nating taimtim nananalangin.
Walang nakapansin nang ito'y kanyang gawin At nang ito'y pulutin ng butihing Mother natin Nakita niyang bali-bali ngunit nakapako pa rin Si Kristong Panginoon natin.
Larawan mula sa Google.
Kanyang pinagdikit-dikit bali-baling katawan Na parang nabendahan tulad ng isang sugatan Saka inutusan ng madreng maalam kanyang mga kasamahan Kanyang tinuran sa kanila, mahigpit na tagubilin:
Isabit muli sa ating dingding nabaling Krusipihiyo natin At inyo ring idikit kalapit yaring panalangin, "Hayaan po ninyo Panginoon na paghilumin Nitong aking mga kamay nawasak mong katawan."
Larawan ng mosaic sa kripta ng Katedral ng Maynila. Kuha ni Arch. Philip Santiago, Oktubre 2016.
Ito ang aral na lagi nating pakantandaan Kaya minsan-minsan dapat nating pagnilayan Paano nasugatan at patuloy nating sinasaktan Ng ating mga kasalanan yaring Mahal na Katawan.
Sa naturang kuwento ng ating banal Kanyang dasal sana'y di lamang natin mausal Katulad niya'y ating maisabuhay Paano ating mga kamay makakaramay.
Mula sa Google.
Mga kamay ni Hesus sa krus katulad ay tulay Nag-uugnay, nagbibigay-buhay Sa mga handang abutin Diyos at kapwa natin Sa pag-ibig na walang kapalit na hinihiling.
lordmychef.com 