Lalawigan ng Tokhang

Lawiswis ng Salita ni P. Nicanor F. Lalog II, Ika-09 ng Hulyo 2019
Imahen ng Inmaculada Concepcion sa tuktok ng kampanaryo ng Katedral ng Malolos. Larawan kuha ni Lorenzo Atienza, 12 Hunyo 2019.
Nakakagulat, nakakagimbal
Marami ang nagulantang
Sa balitang napakinggan
Lalawigan ng Bulakan
Number one ngayon sa patayan.
 Kadluan ng katagalugan
Na siyang wika ng mga makata
Dito sa Bulakan iba na yata sinasalita:
Tokhang na mula sa Bisaya
Nawala na ang puso sa pananalita pati sa gawa.
Nasaan mga namumuno ng pamahalaan at Simbahan
Paano nagkaganyan itong duyan ng kasaysayan
Naging bukirin ng patayan
Nang hindi namamalayan o
Dahil wala tayong pakialam?
Noon pa mang makalawang taon
Pinakamaraming natokhang noong linggo ng Bulakan
Natabunan lamang ng balitang pagpatay
Ng mga pulis sa walang kamalay-malay na kabataan
Kian kanyang pangalan doon sa Kalookan.
Pansamantalang tumigil mga patayan
Kinasuhan mga berdugo ni Kian
Ngunit kanilang hepe sa Kalookan
Binigyan ng pabuya upang pamunuan
Pulisya sa buong lalawigan ng Bulakan.
Ano na nga ba nangyari sa atin, mga kababayan?
Di lamang nanunungkulan kungdi pati mga mamamayan
Wala na ba tayong pakialam
Mga dating luntiang sakahan ay tinambakan
Upang gawing paradahan ng mga container van?
Bago pa dumating ang tokhang
Pinatay na rin mga ilog at sapa natin
Kaya maraming lupain naging dagat-dagatan na rin
Habang hinahayaan nating gahasain
Bulubundukin ng Sierra Madre upang samsamin kayamanan natin.
Nawala na yata pasintabi
Pati mga simbahan ginigiba, iniiba
Kabanalan hinalinhan ng kaartehan
Diyos hindi ni makita o maramdaman
Puro palabas, nawala na napapaloob na kahulugan.
Halina at magsuri, magmuni-muni
Ating pagbulayan kahulugan nitong buhay
Matatagpuan kung ano ating niyuyungyungan
Madalas siya rin nating pinahahalagahan
At tiyak naroon din ating kayamanan.
Mabuting Pastol, kaawaan at kalingain aming lalawigan na tila pinabayaan ng iyong mga pinagkatiwalaan! Larawan ng luklukan ng Katedral ng Malolos. Kuha ni Lorenzo Atienza, 12 Hunyo 2019.

One thought on “Lalawigan ng Tokhang

  1. everything is in chaos here .
    We need a true charismatic true opposition leader, daring and fearless, that will inspire us and lead US to fight and resist the evil administration in our government.
    God please have Mercy on us. Send us your anointed leader thru Jesus Christ. Amen

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s