Pananahimik

Lawiswis ng Salita ni P. Nicanor F. Lalog II, ika-8 ng Abril 2019

Madalas nating akalain
Pananahimik ay kawalan ng imik
Tinitikom yaring mga bibig
Di pinapansin mga naririnig.

Ang tunay na pananahimik ay pakikinig
Sa gitna ng katahimikang pilit dinaraig
Ibuka ang bibig dahil baka kumabig ang dibdib
Manaig iniisip sa loob ng munting daigdig.

*Larawan kuha ni G. Howie G. Severino ng GMA-7 News sa Taal, Batangas, Nobyembre 2018.*

Taliwas na madalas na kaisipan
Katahimikan ay hindi kawalan kungdi kaganapan
Mundo'y hindi iniiwan bagkus tinutunguhan
Niyayakap at niyayapakan upang lubos na maranasan.

Sa panahong atin ngayong ginagalawan
Puro ingay at salitaan, walang unawaan
Hindi mapigilan talastasan na wala namang kaliwanagan
Puro kadiliman, walang naiintindihan dahil walang katahimikan.

Tanging sa katahimikan mapapakinggan
Ibinubulong at kinukuyom ng ating kalooban;
Gayon din naman sa katahimikan matutukalasan
Kahulugan ng sinasaysay ng sino mang pinakikiharapan.

Kung ibig ninumang Diyos ay makaniig at mapakinggan
Kanyang mga Salita kailanma'y hindi maiintidihan
Kung ang Kanyang katahimikan ay di natin kayang sakyan 
Dahil ang Diyos sa Kanyang kaibuturan ay pawang kahulugan at kaganapan.

*Ang talong Shifen sa Taiwan. Larawan kuha ng may-akda, Enero 2019.*

Sikaping makaibigan ang katahimikan
Bagama't hindi madali, ito ay maaring pagsumakitan
Dahil dito lamang matatagpuan mahahalaga at walang kabuluhan
Pati na mga bagay na pansamantala at pangmagpakailanman.

Sa katahimakan ating nabibistay 
Mga bagay na lantay at walang saysay
Buhay ay nahihimay, nakikita ang tunay 
Kapag tayo ay naghinay-hinay sa daloy nitong buhay.

Ating pagkatao ang siyang dinadalisay
Takbo ng buhay nagiging matiwasay
Dahil sa katahimikan buo ang ating pagtitiwala 
Kasabay ang pananampalatayang walang kapantay.

Larawan kuha ni G. Raffy Tima ng GMA-7 News sa Batanes, Agosto 2018.

Alibughang ama ng mga alibughang anak?

Lawiswis ng Salita ni P. Nicanor F. Lalog II, ika-01 ng Abril 2019

Sisihin aking mapaglarong isipan
Dahil panahon ng halalan
Paano nga kaya kung minsan
Mabaligtad naman takbo nitong kwentuhan?

Mayroong magkakapatid
Ang ama nila ay hindi maintindihan
Hindi nila maramdaman 
Kung sila'y ganan niya na sobrang yabang.

Wala siyang hindi pinapatulan maging kababaihan man
Dinaraan sa mararahas na usapan
Pero kung maiipit sa mga salitang binitiwan
Sasabihin niya na ang lahat ay biruan at kunwari lamang.

Humingi ng paumanhin nang murahin Santo Papa natin
Ngunit nang ang Diyos ang kanyang lapastanganin
Hindi na mailihim kanyang tililing at pagka halimaw na rin 
Nang ang lahat ay ibig patayin maging mga alagad ng Simbahan natin.

Kaibayo pagkakaiba niya sa lahat ng ama
Na sa halip buhayin, lahat ay ibig niyang tokhangin
Masasamang loob at mga makasalanan sa kanya ay walang kabuluhan
Hindi niya alintana kanilang kahirapan dahilan ng kawalanghiyaan.

Sa talinghaga nagdalita ang alibughang anak
Nagtika sa malaking pagkakasala saka nagbalik-loob;
Kumpara sa ating nararanasan, matatagalan pa pagsadsad sa kailaliman
Kaya kahambugan at kasinungalingan hindi matitigilan.

Mas mahirap pala kung ama ang siyang alibugha
Dahil higit sa lahat bago maging ama ang sino man
Kailangan siya muna kakitaan di lamang ng kahusayan at kagalingan
Kungdi higit sa lahat ng kabutihan at katinuan.

Kung paano naluklok ang isang alibughang ama
Madaling malalaman bagama't walang pupuntahan ating sisihan
Mabuti pa'y tingnan ating kalooban sa sinapit nating kalagayan
Di kaya dahil tayong mga anak ay alibughang puno ng pagkukulang?

“Walang Laman”

Lawiswis ng Salita ni P. Nicanor F. Lalog II, Ika-11 ng Marso 2019

 
Apatnapung araw nag-ayuno si Kristo
Nang siya ay tinukso ng diyablo:
“Kung ikaw ang Anak ng Diyos,
Gawin mong tinapay itong bato.”


Gutom at walang laman tiyan ni Kristo
Ngunit hindi napatangay sa tukso ng diyablo
Hindi siya nalito, naging matibay tulad ng bato
Na buhay ng tao higit nakasalalay di lamang sa tinapay
Kungdi sa Salita ng Diyos na bumubuhay, gumagabay na tunay.


Ito ang pangunahing katotohanang
Dapat nating pakatandaan
Na hindi sapat, at lalong di dapat
Tayo ay mapuno at mabusog 
Ng mga bagay ng mundo upang hindi matukso at malito.


Maraming pagkakataon
Lalo tayong nababaon
Sa balon ng pagkagumon
Kapag lahat tayo ay mayroon
Na malayo naman sa naaayon.


Sa pag-aayuno tayo napapanuto
Tumitibay ating pagkatao
Nawawala pagkalito sa higit na totoo
Na si Hesu-Kristo naparito upang samahan tayo
Maiwaksi at malampasan maraming tukso.


Mangyayari lamang ito kung tulad ni Kristo
Masasaid natin ating sariling kalooban
Di lamang bawasan kungdi mawalan ng laman
Magkaroon ng puwang sa ating kalooban
Diyos na ating tanging yaman.

Larawan ng ilang sa Israel tulad marahil ng pinuntahan ni Hesus nang Siya ay tuksuhin ng Diyablo. Kuha ng may-akda noong Abril 2017. Ang unang larawan sa itaas ay mula sa Google.

“Kuwaresma”

Lawiswis ng Salita ni P. Nicanor F. Lalog II, Ika-04 ng Marso 2019

Kuwaresma.

Kuwarenta dias ng paghahanda
Bawat araw balot ng hiwaga
Ng mga salita nagmumula
Sa ating Bathala.

Apatnapung araw ng pagtitiis
Maraming naiinis, naiinip
Ayaw subukang namnamin ang tamis
Dahil ang lahat ay pinabibilis.

Ang susi ay naroon sa ating budhi
Kung tayo ay makapananatili ng ilang sandali
Sa bawat araw ng ating paglagi
Kapiling ating Hari na kanyang sarili ibinahagi.

Tuwing kuwaresma
Ating kinukuwenta mga ligayang ipinauubaya
Ngunit di natin alintana
Biyaya at pagpapala kapag tayo’y nagpaparaya.

Akala kasi natin tayo ay nawawalan 
Sa paghuhunos dili, pag-aayuno 
At iba pang mga gawain ng kabanalan 
Gayong ang totoo, napupuno tayo ng Espiritu Santo.

Kung tutuusi'y isang munting Kuwaresma
Itong ating buhay araw-araw
Ating pananaw namumulat na pinakamahalaga
Hindi ang ating taglay kungdi ang ating inaalay at binibigay.

*Ang mga parehong larawan ay mula sa Google.*

“Kung Mamasukan Sa Atin Ang Diyos”

Lawiswis ng Salita ni P. Nicanor F. Lalog II

Ika-25 ng Pebrero 2019

Hanggang ngayo’y hindi ko pa rin mawari

Ang tagpo noon sa baybayin ng Lawa ng Genesaret

Nang ang makapangyarihan Hari ng mga hari

Humiram ng bangka kay Simon na isang hamak.

Sa aking pagbubulay-bulay sa tagpong iyon

Sumilay sa aking malay kung paano kaya

Itong Panginoon Hesus ay biglang mag-apply

Upang mamasukan sa atin bilang tauhan natin?

“Sir…o kaya’y ma’am” marahil ang bati Niyang marahan.

“Ibig ko po sanang mag-apply bilang inyong tauhan

Diyan sa inyong puso at kalooban

Na tila baga laging nabibigatan at sugatan.”

“Ang dami-rami mo nang naging mga bossing

Kaya mga utos di matalos pulos naman galos ang iyong tantos;

Subukan mo naman akong ika’y pagsilbihan

Diyan sa iyong puso at kalooban, di kita sasaktan, peksman.”

“Hindi ako magpapahinga maski ika’y kapusin ng hininga

Araw gabi ako ang iyong karamay sa lahat ng iyong away

Gagabay sa iyong mga pagpapasya at desisyon na agaw-buhay

Hindi kita bibigyan ng rason para dumaing o manghinayang.”

“Sa aking sasahurin, huwag nang alalahanin

Dahil isa lang naman ang aking hiling:

Pangakong ako lang ang iyong mamahalin at susundin

Asahan mo walang tigil na dating ng pag-ibig at pag-ibig pa rin.”

Ano pa ba ang ating mahihiling

Kung ganito ang mamamasukan sa atin?

Aba, ay atin nang tanggapin

Itong Panginoong Hesus na piniling maging ating alipin!

DSCF1078 — Aming larawan noong Abril 2017 ng pag-iistasyon ng Krus sa Jerusalem patungo sa Simbahan ng Holy Sepulcher kung saan ipinako at muling nabuhay sa Hesus. Isang napaka-gandang karanasan ng pag-ibig ng Diyos sa atin na madarama mo ng personalan sa Holy Land.

“Bugtong ng Buntung-hininga”

Lawiswis ng Salita ni P. Nicanor F. Lalog II

Ika-18 ng Pebrero 2019

Bugtong palabugtong,

ako’y mayroong tanong:

Bakit nga ba sa tuwing ako’y napapabuntung-hininga

Ako’y sinasaway ng iba?

Walang paliwanag maibigay kanilang mga bibig

Malibang sabihing “a basta… huwag kang magbuntung-hininga!”

Kaya naman sa aking pagtataka,

Lalo pa akong napapabuntung-hininga.

Kahali-halina kasi itong pagbubuntung-hininga

Lalo na’t bigla kang mayroong nagunita

Kapos sa pananalita, walang mahagilap na kataga

Kung kaya’t humihinga na lang ng malalim.

Ito ngang Panginoong Hesus natin

Minsa’y napabuntung-hininga rin

Nang siya ay tanungin at kulitin

Ano’ng tanda kanyang maibibigay upang siya ay sambahin.

Katulad niya, tayo ma’y napapabuntung-hininga

Kapag tayo ay namamangha o napapatunganga

Sa mga pagkakataong di tayo makapaniwala

Lalo na’t hindi makita ni makuha ng iba mga bagay na kay ganda.

Sa pagbubuntung-hininga, ano mang buti at ganda

Na ating nakita, sinasariwa ng puso at alaala

Upang pagparoonan at maiwasan

Pakikipag-banggaan sa mga lilong hunghang.

Maganda at mabuti ang pagbubuntung-hininga

Naaabot katotohanang nakabaon sa kaibuturan natin

Hindi kayang ituring ni sabihin ng bibig natin

Liban nitong puso na parang hanging hininga natin.

DSCF1435 — *Ang makabuntung-hiningang talon ng Shifen sa Taiwan. Kuha ng may-akda, 30 Enero 2019.*

“Magpahiram sa Diyos”

Lawiswis ng Salita ni P. Nicanor F. Lalog II

Ika-13 ng Pebrero 2019

Hinangaan at pinalakpakan

Nguni’t nang sabihin ang katotohanan

Siya ay ating pinagdudahan

Halos ipagtulakan palabas ng ating buhay.

Ganyang-ganyan din ginawa noon ng mga tao kay Hesus

Nang siya ay umuwi sa kinalakhang bayan

Nangaral sa sinagoga isang araw ng pamamahinga

Nang ang lahat ay namangha ngunit nagduda rin sa kanya.

Gayon pa man sa ating pabago-bagong pamamaraan

Patuloy pa rin si Hesus sa pagdaraan

Dumarating sa araw-araw nating pamumuhay

Nangangaral, nag-aanyaya na tayo ay tumalima sa kanyang salita.

Ganyang-ganyan kanyang ginawa bago maghimala

Sa pangingisda nina Simon Pedro at mga kasama

Nang siya ay maupo at mangaral sa ibabaw ng kanyang bangka

Isang umaga sa may Lawa ng Genesaret.

Siya na makapangyarihan, Hari ng mga hari

Akalain mong manghiram ng bangka

At matapos makapangaral, nag-ayang pumalaot

Upang ihagis mga lambat sa dakong kalaliman?!

Ganyang-ganyan din sa atin si Hesus

Hinihiram maraming nasa atin

Tulad ng kayamanan, panahon at galing

Na ang totoo’y sa kanya naman lahat nanggaling.

Katulad ni Simon Pedro, sa atin ma’y nanghihiram ang Diyos

Ng ating mga sarili na maghapon at magdamag nagpapagal, wala pa ring huli;

Katulad ni Simon Pedro, pagbigyan nating makinig at tumalima sa Banal na Salita

Ipahiram natin sa Diyos lahat ng sa atin, tiyak magiging malalim yaring buhay natin!

499-catch-of-fish--mosaic — *Mosaic sa loob ng simbahan ni San Pedro sa Capernaum naglalarawan nang hiramin ni Hesus ang bangka ni Simon sa Lawa ng Genesareth. Mula sa Google.*

“Magpa-hinga sa Diyos”

Lawiswis ng Salita ni P. Nicanor F. Lalog II

Ika-22 ng Enero 2019

“Goodbye bakasyon, hello baon!”

Nakakatawang sinulat ng aking sacristan

Sa kanyang Facebook matapos ang Bagong Taon

Na tila baga pinaglulubag kanyang kalooban

Sa bakasyong papatapos na noon.

Maraming tao ngayon kapag bakasyon

Batid lamang ay puro selebrasyon

Na hindi nauunawaan diwa ng okasyon

Kaya di maglaon lumilipas lamang ito ng gayon.

Itong salita na bakasyon ay ating hiniram

Sa wikang Inggles na vacation na ang ugat ay Latin

Na ang ibig sabihi’y walang laman o kaya’y sairin

Upang ma-vacate o mabakante kalooban natin.

Kaya naman ang salin nito sa sariling wika natin

Ay mas malalim at nakahiling sa loobin ng Diyos natin

Noong matapos Niyang likhain lahat sa daigdig natin

Namahinga Siya at tinakda Niyang itong tawagin Sabbath.

Kaya nga kung tutuusin itong pamamahinga

Ay hindi lamang pagtigil sa maraming tungkulin at gawain

Kungdi upang sairin itong kalooban natin

At punuing muli ng hininga ng Diyos na Siyang buhay natin.

Mula nang ang tao ay palayasin sa Paraiso

Dahil sa pagkakasala ng mga ninuno natin

Sariling paningin ay pumangit din kaya’t sa Diyos

Ay nagtago matapos kagatin bawal na bunga sa hardin.

Kaya nga yaring araw ng pamamahinga ay biyaya para sa atin

Dahil kapag ito ay ating ipinangingilin nagbabalik tayo sa Eden

Diyos ay nakakapiling at muling nakakamukha natin

Dahil Espiritung pumupuspos sa atin ay Kanyang hininga rin.

Huwag sana nating limutin di lamang kahalagahan

Kungdi pati kahulugan nitong bakasyon na tayo ay hingahan ng Diyos

Upang mapuno ng Kanyang buhay na siyang gagabay

Sa ating paglalakbay hanggang sa Kanya ay humimlay habangbuhay.

*Unang larawan ay kuha ng makata sa Assumption Sabbath sa Baguio; ang ikalawa ay kuha ni G. Raffy Tima ng GMA-7News sa Sampaloc Cove, Subic, Zambales.

“Panaginip o Pangarap?”

Lawiswis ng Salita ni P. Nicanor F. Lalog II

Ika-08 ng Enero 2019

Kung tawagin ito sa Inggles ay dream

Ngunit kung ating tutuusin sa wika nati’y

Kahulugan ay mas malalim.

Panaginip kung tawagin

Mga pangitain at gunitain

Nakita natin pagkagising.

Ngunit kung adhikain o mithiin ang ibig mong sabihin

Bagamat sa Inggles ito ay dream

Sa wika nati’y pangarap ang turing.

Mga panaginip kadalasa’y basta lamang sumasagitsit

Bagamat bunsod ng ating pag-iisip

Na tila baga laro laro lang sa ating isip.

Ngunit ang pangarap ay higit pa sa ating naiisip

Dahil ito kadalasan ay nakadikit at malapit

Sa pintig at saloobin nitong puso at damdamin.

Mas nagkakatotoo ang pangarap

Dahil ito ay pananaginip ng gising

na bawat mithiin at adhikain ay pilit tutuparin.

Ngayong 2019 ikaw ba’y mananaginip pa rin

Mga pag-idlip ang aatupagin o ika’y gigising

Upang tuparin mga pangarap nakapako pa rin?

43758068_10156156830637758_5322722531499573248_n

Larawan mula kay G. Raffy Tima ng GMA7-News. Ginamit ng mga kapahintulutan niya.

“Bagong Taon, Bagong Panahon”

Lawiswis ng Salita ni P. Nicanor F. Lalog II

Ika-01 ng Enero 2019

Maraming pong salamat

Mga ginigiliw kong tagatangkilik

Nitong dati kong panaginip

Maisatula aking mga tilamsik ng pag-iisip.

Madalas tuwing bagong taon

Sa pagharap natin sa mga paghamon

Lagi nating tugon ay new year’s resolution

Na kalauna’y mga pangakong nababaon.

Hindi tayo makakasulong taun-taon

Kung parati mayroon tayong mga rason

Alibi at mga dahilan para bigyang katwiran

Iba’t ibang sitwasyon kaya tayo hindi makaahon.

49548159_10157026686917996_7763111631847948288_n

Bagong taon, bagong panahon

Bawat pagkakataon ay isang paghamon

Ng pagpapakatotoo sa ating pagkatao

Kung ibig nating lumago, iwanan nakaraan,

Mamuhay sa kasalukuyan, pag-aralan mga dating kamalian;

Mga sugat nating kinasaktan, huwag nang takpan

Bagkus pahanginan sa kasalukuyan upang tuluyang gumaling

Para ating maibaling mga paningin sa mga dapat gawin at ayusin.

Bagong taon, bagong panahon

Pumalaot sa mga dakong di nasusubukan o napupuntahan

Magsagwan kung kinakailangan

Sa gitna nitong ilog ng buhay na walang katiyakan

Maliban sa tahakin landas ng kabutihan at kababaan

Tulad ng pananalangin sa awa at habag ng Maykapal;

Hindi magtatagal lahat ng ating pagpapagal

Sa ati’y dadatal mga dasal nating inuusal.

*Larawan ay obra ng Bulakenyong pintor na si Aris Bagtas; pinili ko ang larawang ito upang maipakita ang pakikibaka ng may tuwa sa bagong taon ng 2019. Ginamit ng may kapahintulutan.