Lawiswis ng Salita ni P. Nicanor F. Lalog II, Ika-12 ng Hunyo 2019
Mula google.
Tuwing sasapit petsa dose ng Hunyo Problema sa ating mga Filipino Nahahayag sa pagdiriwang na ito Na tila hindi natin tanto kahulugan nito.
Ano nga ba ang wasto, Araw ng kalayaan o araw ng kasarinlan? Parehong totoo at magkahawig sinasaad ng mga ito Ngunit malalim at malaki pagkakaiba mga ugat nito.
Mula sa Wikipedia.
Kung pagbabatayan ating kasaysayan Araw ng kasarinlan ang petsang ito Nang bumukod at magsarili tayo bilang isang bansa Pinatatakbo ng mga sariling mamamayan at kababayan.
Ngunit totoo rin namang sabihing Higit pa sa kasarinlan natamo natin sa petsang ito Kaya nararapat tawaging araw ng kalayaan Nang lumaya ating Inang Bayan sa pang-aalipin ng mga dayuhan.
Larawan mula sa ABS-CBN News.
Maituturing bang may kasarinlan ating bayan Kung wala namang kalayaan linangin at pakinabangan Kanyang likas na yaman lalo na sa karagatan Gayong tayo ay bansang binubuo ng mga kapuluan?
Tayo nga ba ay nagsasarili at masasabing may kasarinlan Kung turing sa atin ay dayuhan sa sariling bayan Walang matirhan lalo na mga maliliit nating kababayan Dahil sa kasakiman ng ilang makapangyarihan sa pagkamkam?
Gayon din naman sana'y ating matingnan Kung tunay itong ating kalayaan Marami pa rin ang nabubulagan at hindi matagpuan Dangal ng kapwa na madalas ay tinatapakan.
Ang tunay na kalayaan ay ang piliin at gawi'y kabutihan Kaya ito ma'y kasarinlan dahil ito'y kakayahang Kumawala at lumaya sa panunupil sa sariling pagpapasya Walang impluwensiya ng iba kungdi dikta ng konsiyensiya.
Larawan mula sa Google.
Kalayaan at kasarinlan kung ating pagninilayan Dalawang katotohanang nagsasalapungan Kung saan mayroong pagtatagpo ng kabutihan Paglago at pagyabong ng buhay tiyak matatagpuan.
Lawiswis ng Salita ni P. Nicanor F. Lalog II, Ika-3 ng Hunyo 2019
Larawan mula sa Google.
Noong si Hesus ay nilitis Ni Pilato na tingin sa kanya'y malinis, Ano aniya ang katotohanan Na hanggang ngayon ating tinatanong Sa Panginoong lagi nating hinahamon.
Sayang noon ay hindi tumugon Itong Panginoon sa naturang tanong Upang sana'y maliwanag na sa ating ngayon Kahulugan ng katotohan na palaging naaayon Sa kanya-kanya at sariling interpretasyon.
Ngunit kung ating paglilimi-limihan Hindi sinagot ng Panginoon si Pilato noon Dahil mali ang kanyang tanong: hindo "ano" Kungdi "nasaan" ang katotohanan upang kapag natunton Ito'y maisasabuhay natin sa lahat ng pagkakataon.
Mismong ang Panginoon nagsabi noon Na siya ang daan, ang katotohanan, at ang buhay; Alalaong-baga, itong katotohanan ay isang "person" Kaya naman ang pagsuri sa katotohanan Masasalalay palagi sa pagpapahalaga natin sa buhay.
Umiiral lamang ang kasinungalingan Na siyang kabaligtaran ng katotohanan Kapag katauhan ng kapwa hindi natin pinahahalagahan, Binabale-wala at isinasantabi dangal ng kapwa Kaya lahat ng masasabi ay malayo sa laman ng budhi.
Kung sisikapin lamang natin Mapahalagahan bawat kapwa natin Hindi tayo magsisinungaling o magmamagaling Dahil maliwanag di lamang sa isipan natin Yaring katotohanang nananahan sa puso natin.
Lawiswis ng Salita ni P. Nicanor F. Lalog, ika-27 ng Mayo 2019
Larawan mula sa Google.
Ipagpaumanhin kahit ako'y hindi naman mahinhin Bakit tila baga tayo ay nahuhumaling sa mga usapin At paksang karimarimarim kung saa'y Kalaswaan nagiging isang katatawanan?
Hindi lamang minsan kungdi kadalasan Ito na nga yata katauhan ng mama sa Malakanyang Na kung hindi kasinungalingan o kalokohan Kasalahulaan at kalaswaan laging binibitiwan.
Kailanman ay hindi katatawanan Gawing biro lamang o paksa sa usapan Na wala namang katuturan Panghahalay sa kababaihan.
Larawan mula sa Google.
Simula't sapul palagi na lamang Kababaihan tampulan ng mga panlalait at sisihan Na tila baga walang kasalanan Mga kalalakihan sakdal sa kalinisan at kahusayan.
Madalas hindi nalalaman ng kalalakihan Hinugot ang babae sa kanyang tadyang Hindi lamang upang siya ay ingatan at pangalagaan Kungdi dahil kapantay sa dangal at katauhan.
Sa lahat ng paglapastangan sa kababaihan Panghahalay ang kasukdulan Dahil niyuyurakan sinapupunan Na siyang pinanggalingan ng sangkatauhan.
Larawan mula sa Google.
Napakinggan mo na ba Daing na hindi maisigaw o maibulalas Ng isang hinalay, lalo na yaong nag-alay ng buhay Upang mamasukan sa ibang bansa?
Nakita mo na ba mga mata na hindi makatingin Ulo ay nakatungo dahil sa bangungot na hindi magising Luha hindi mapahirin sa bigat at sakit ng damdamin Ng isang babaeng hinalay o puri'y nadungisan?
Aynakupo...! Nag-aalimpuyong galit kasabay Ang pait at sakit sa tiyan at dibdib Na halos ika'y mabuwal at maduwal Sa gayong sinapit na dama pa rin ang sakit.
Ang pinakamalupit kapag babae ay hinalay Ay iyong mapagtanto na isa itong impakto Nagkukubli sa inapi na maaring babaeng iyong itinatangi: Sariling ina o asawa, kapatid o anak.
Kapag kalaswaan ay nagiging isang katatawanan Dangal ng katauhan di lamang ng kababaihan Ang hindi na pinahahalagahan hanggang maubos ang halakhakan Dahil mga tao'y magsasakmalan na parang mga hayop na lamang.
Estatwa ni Maria nang dalawin niya si Elizabeth sa kaburulan ng Judea; mula sa kanilang sinapupunan sumilang ating kaligtasang hatid ni Hesus na inihanda ni Juan Bautista. Dalawang kababaihan kumakatawan sa kadakilaan at karangalan ng mga babae sa ating buhay: ina, asawa, kapatid, anak, at kaibigan. Larawan ng may-akda, Abril 2017.
Lawiswis ng Salita ni P. Nicanor F. Lalog II, ika-22 ng Abril 2019
Larawan mula sa Google.
Busilak at ningning ng Pasko ng Pagkabuhay Hindi magiging makulay Kung hindi naging mapanglaw at madilim Malagim na Viernes Santo ni Kristo.
Ito ang katotohanang dapat nating matanto Walang Pasko ng Pagkabuhay kung walang Viernes Santo; Kaya itong si Hesu-Kristo unang tinungo ayon sa katesismo Kinaroroonan ng mga yumao noong Sabado Santo.
Sa kanyang pagtatagumpay sa kadiliman Hindi na tayo maaring panaigan ng kamatayan Kaya pati lagim ng kadiliman kanya nang nakaibigan Upang tayo ay magwagi kapag nasasawi.
Larawan mula sa Google.
Katulad noong kinagabihan ng Pasko ng Pagkabuhay sa Emaus Tayo ay sinasabayan sa paglalakad sa buhay nitong si Hesus Nakikinig sa ating mga karaingan at kabiguan At sa gitna ng kadiliman, ibinabahagi sa atin kanyang katawan.
Buksan ating mga isipan, lawakan ang pananaw Puntahan ang kadiliman sa ating kalooban upang maliwanagan Buhay ay hindi isang palabas lamang, parang pelikula Palaging bida sa bawat eksenang nililiwanagan ng artipisyal na ilaw.
Kaya nga kataka-taka, namamangha ka ba? Sa ating panahon at mundo na puro palabas ang tao Lalong nalilito, mga lilo nananalo sa puwesto Lahat pasikatan, patalbugan pero malayo sa katotohanan.
Starry Night ni Van Gogh mula sa Google.
Tanging liwanag ni Kristo ang totoo dahil siya ito mismo Maningning, maliwanag ang busilak Katulad ng mga bituin at buwan sa gabing madilim Hatid ay tiwala at sampalataya dahil sa pag-asa ng bagong umaga!
Halina at pumaloob sa kaibuturan ng ating pagkatao Doon ating makakadaop si Kristong muling nabuhay Nililiwanagan ating puso at kalooban ng kanyang katotohanan Upang tunay tayong makapamuhay at hindi magpalabas lamang.
Lawiswis ng Salita ni P. Nicanor F. Lalog II, ika-16 ng Abril 2019
Ngayong Semana Santa aking naalala Aking nabasa isang tunay na istorya Tungkol kay Santa Mother Teresa Noong nabubuhay pa siya sa Calcutta.
Minsan daw isang alaga nilang kulang-kulang Sinidlang bigla ng galit na di maintindihan Krusipihiyo sa dingding nabalingan ng pansin Ibinato sa Santa nating taimtim nananalangin.
Walang nakapansin nang ito'y kanyang gawin At nang ito'y pulutin ng butihing Mother natin Nakita niyang bali-bali ngunit nakapako pa rin Si Kristong Panginoon natin.
Larawan mula sa Google.
Kanyang pinagdikit-dikit bali-baling katawan Na parang nabendahan tulad ng isang sugatan Saka inutusan ng madreng maalam kanyang mga kasamahan Kanyang tinuran sa kanila, mahigpit na tagubilin:
Isabit muli sa ating dingding nabaling Krusipihiyo natin At inyo ring idikit kalapit yaring panalangin, "Hayaan po ninyo Panginoon na paghilumin Nitong aking mga kamay nawasak mong katawan."
Larawan ng mosaic sa kripta ng Katedral ng Maynila. Kuha ni Arch. Philip Santiago, Oktubre 2016.
Ito ang aral na lagi nating pakantandaan Kaya minsan-minsan dapat nating pagnilayan Paano nasugatan at patuloy nating sinasaktan Ng ating mga kasalanan yaring Mahal na Katawan.
Sa naturang kuwento ng ating banal Kanyang dasal sana'y di lamang natin mausal Katulad niya'y ating maisabuhay Paano ating mga kamay makakaramay.
Mula sa Google.
Mga kamay ni Hesus sa krus katulad ay tulay Nag-uugnay, nagbibigay-buhay Sa mga handang abutin Diyos at kapwa natin Sa pag-ibig na walang kapalit na hinihiling.
Lawiswis ng Salita ni P. Nicanor F. Lalog II, Ika-12 ng Abril 2019
Larawan mula sa Google.
Papatapos na ang Kuwaresma Malapit na ang Semana Santa Halina't magtika sa ating mga pagkakasala Upang madama dakilang pag-ibig Niya.
Minsa'y aking nakita estatwa sa karosa Paglalatigo sa haliging bato ni Hesu-Kristo; Natigilan at nagmuni-muni ako Pinagnilayan kaawa-awang larawan.
Ayon sa kuwento sa ebanghelyo Ng minamahal na disipulo ni Kristo Nagkakagulo mga tao kaya natakot si Pilato Na palayain si Kristo sa mga bintang na di totoo.
Naramdaman ko sa pagninilay ko Pagbabakasakali ni Pilato Kung ipahampas niya sa haliging bato Baka maawa mga tao kay Kristo.
Simbahan ng Sagrada Familia, Barcelona, Espana. Kuha ni Arch. Philip Santiago, Oktubre 2018.
Nagkamali si Pilato, hindi nabago mga lilo Kaya binabaran ko tagpong ito sa praetorio Sinikap kong sulyapan habang pinagninilayan Sugatan niyang katawan labis pinagmalupitan.
Sa aking katahimikan at kalungkutan Aking napakinggan kanyang tinuran: "Masdan kagagawan tuwing katotohanan Ay hindi ninyo mapangatawanan."
Natigilan ako, totoo ba aking napakinggan Muli sa aki'y tinuran ng Poong sugatan: "Hindi naman ako talagang inyong sinasaktan Sa ginagawa ninyong mga kasalanan."
Sa katahimikan nitong aking pagninilay Ako nasaktan nang makita siyang duguan Sa mga mata niyang malamlam aking ramdam Kanyang habag at kaamuhan.
Ginawa ni Pilato alalaong-baga Sa kasabihan nating mga Filipino Ay namangka sa dalawang ilog Kanyang pinagsabay mga bagay na magkahiwalay.
Hindi makapamili kung susundin ang budhi Nahihirati sa kiliti ng ilang sandali Hindi alintana mga sugat at hapdi Lalo lamang tayo nasasawi.
Halina't magsuri ng maigi Baka tayo ma'y ganyan ang gawi at ugali Katotohanan at kabutihan hindi kayang panindigan Inaasam kusang bubuti masamang kalagayan.
Ipahahampas mo ba muli si Kristo Sa haliging bato ng ating pagkalito? Hahatol ka ba tulad ni Pilato Na tiyak naman tayo ang talo?
Lawiswis ng Salita ni P. Nicanor F. Lalog II, ika-8 ng Abril 2019
Mula sa Google.
Madalas nating akalain Pananahimik ay kawalan ng imik Tinitikom yaring mga bibig Di pinapansin mga naririnig.
Ang tunay na pananahimik ay pakikinig Sa gitna ng katahimikang pilit dinaraig Ibuka ang bibig dahil baka kumabig ang dibdib Manaig iniisip sa loob ng munting daigdig.
Larawan kuha ni G. Howie G. Severino ng GMA-7 News sa Taal, Batangas, Nobyembre 2018.
Taliwas na madalas na kaisipan Katahimikan ay hindi kawalan kungdi kaganapan Mundo'y hindi iniiwan bagkus tinutunguhan Niyayakap at niyayapakan upang lubos na maranasan.
Sa panahong atin ngayong ginagalawan Puro ingay at salitaan, walang unawaan Hindi mapigilan talastasan na wala namang kaliwanagan Puro kadiliman, walang naiintindihan dahil walang katahimikan.
Tanging sa katahimikan mapapakinggan Ibinubulong at kinukuyom ng ating kalooban; Gayon din naman sa katahimikan matutukalasan Kahulugan ng sinasaysay ng sino mang pinakikiharapan.
Kung ibig ninumang Diyos ay makaniig at mapakinggan Kanyang mga Salita kailanma'y hindi maiintidihan Kung ang Kanyang katahimikan ay di natin kayang sakyan Dahil ang Diyos sa Kanyang kaibuturan ay pawang kahulugan at kaganapan.
Ang talong Shifen sa Taiwan. Larawan kuha ng may-akda, Enero 2019.
Sikaping makaibigan ang katahimikan Bagama't hindi madali, ito ay maaring pagsumakitan Dahil dito lamang matatagpuan mahahalaga at walang kabuluhan Pati na mga bagay na pansamantala at pangmagpakailanman.
Sa katahimakan ating nabibistay Mga bagay na lantay at walang saysay Buhay ay nahihimay, nakikita ang tunay Kapag tayo ay naghinay-hinay sa daloy nitong buhay.
Ating pagkatao ang siyang dinadalisay Takbo ng buhay nagiging matiwasay Dahil sa katahimikan buo ang ating pagtitiwala Kasabay ang pananampalatayang walang kapantay.
Larawan kuha ni G. Raffy Tima ng GMA-7 News sa Batanes, Agosto 2018.
Lawiswis ng Salita ni P. Nicanor F. Lalog II, ika-01 ng Abril 2019
Sisihin aking mapaglarong isipan Dahil panahon ng halalan Paano nga kaya kung minsan Mabaligtad naman takbo nitong kwentuhan?
Mayroong magkakapatid Ang ama nila ay hindi maintindihan Hindi nila maramdaman Kung sila'y ganan niya na sobrang yabang.
Wala siyang hindi pinapatulan maging kababaihan man Dinaraan sa mararahas na usapan Pero kung maiipit sa mga salitang binitiwan Sasabihin niya na ang lahat ay biruan at kunwari lamang.
Humingi ng paumanhin nang murahin Santo Papa natin Ngunit nang ang Diyos ang kanyang lapastanganin Hindi na mailihim kanyang tililing at pagka halimaw na rin Nang ang lahat ay ibig patayin maging mga alagad ng Simbahan natin.
Kaibayo pagkakaiba niya sa lahat ng ama Na sa halip buhayin, lahat ay ibig niyang tokhangin Masasamang loob at mga makasalanan sa kanya ay walang kabuluhan Hindi niya alintana kanilang kahirapan dahilan ng kawalanghiyaan.
Sa talinghaga nagdalita ang alibughang anak Nagtika sa malaking pagkakasala saka nagbalik-loob; Kumpara sa ating nararanasan, matatagalan pa pagsadsad sa kailaliman Kaya kahambugan at kasinungalingan hindi matitigilan.
Mas mahirap pala kung ama ang siyang alibugha Dahil higit sa lahat bago maging ama ang sino man Kailangan siya muna kakitaan di lamang ng kahusayan at kagalingan Kungdi higit sa lahat ng kabutihan at katinuan.
Kung paano naluklok ang isang alibughang ama Madaling malalaman bagama't walang pupuntahan ating sisihan Mabuti pa'y tingnan ating kalooban sa sinapit nating kalagayan Di kaya dahil tayong mga anak ay alibughang puno ng pagkukulang?
Lawiswis ng Salita ni P. Nicanor F. Lalog II, ika-25 ng Marso 2019
Larawan mula sa Google.
Minsan ako'y nainip Walang maisip kaya nanaginip Sa pagbabaka-sakaling makamit Sari-saring mithi maging pagngingitngit.
Sa gitna ng aking mga lakbay-diwa Aking nabatid malaking pagkakaiba Nitong panaginip at pangarap Na tila baga ay iisa.
Kapag nananaginip Madalas isipa'y nasa himpapawirin Bahala na kung saan makarating Basta masiyahan kalooban natin.
Napakadaling managinip Dahil mga mata lamang ay ipipikit At dagliang sasagitsit Mga pantasyang katha ng isip.
Ang taong nangangarap o yaong may pangarap Malalim kanyang nilalayon at hinahangad sa hinaharap Inaapuhap kung paanong matutupad Kaganapan ng pangarap sa kinabukasan.
Sino mang nangangarap o basta mayroong pangarap Kanyang diwa ay tiyak na matalas Mga mata'y laging nakadilat at gising Handang abutin at tamuhin mga tanawing siya lamang nakatingin.
Nasasalamin sa buhay natin kung tutuusin Ang mas hilig gawin natin: Ang managinip at magising O mangarap at tupdin misyon natin.
Takip-silim sa Sabbath Reteat House ng mga madre ng Assumption, Baguio. Larawan ng may akda, Enero 2019. Ano ang pipiliin, m,anaginip o mangarap?
lordmychef.com 