Deboto, debobo

Lawiswis ng Salita ni P. Nicanor F. Lalog II, Ika-11 ng Pebrero 2020

Deboto ang tawag sa isang tao
na malapit at namimintuho
Kay Kristong Nazareno o Sto. Niño
kasama na mga Santo at Santa
sa pangunguna ng Birheng Maria.

Kaya dapat bawat deboto totoo 
uliran at huwaran sa pamumuhay
taglay ay kabanalan nang sa kanya'y
mabanaagan larawan ng kabutihan
ng Diyos sa kanyang kadakilaan.

Kay laking katatawanan at kahangalan
kung ang debosyon ng sino man 
ay haggang simbahan lamang
nakikita paminsan-minsan 
tuwing kapistahan at mga prusisyon sa lansangan.

Anong kahulugan at saysay
ng mga pagpupugay
sa Diyos at kanyang mga banal
kung sa kapwa nama'y manhid
walang malasakit at pakialam?

Nag-aalaga ng mga Poon
binibihisan tila laruan
ngunit pag-uugali at katauhan
malayo sa katuwiran at katarungan
ganyang debosyon dapat tigilan!

Ang tunay na deboto
puso ay malapit kay Kristo
at sa kanyang Ina at mga Santo
may pagmamahal, malasakit
sa kapwa tao na kanyang nirerespeto.

Ano mang debosyon
iyong nakagawian o nakahiligan
araw-araw itong sinasabuhay 
pinaninindigan at tinutularan
aral at buhay ng sinusundang banal.

Sa dami ng mga deboto
bakit ganito pa rin tayo
walang pag-asenso
buhay ay kasing gulo 
ng eksena sa senakulo.

Ay naku!
Ano nga ba tayo,
mga deboto o debobo
asal demonyo, sobrang gulo
pinapako nating muli si Kristo!