Ang ating banga, ang panalok ni Hesus, at ang balon ng Diyos

Lawiswis ng Salita ni P. Nicanor F. Lalog II, Ika-14 ng Marso 2023

Ang kuwento noong Linggo
ng babaeng Samaritana
at ni Hesus sa balon ni Jacob
ay larawan ng buhay natin
na hitik sa mga palatandaan
napakayaman sa kahulugan.

Tayo ang Samaritana
umiigib sa tuwina
banga ay dala-dala
upang sumalok ng tubig
na papawi sa maraming
nilulunggati nauuwi
sa pagiging sawi;
palaging ubos,
hindi sumapat
upang maampat
pagbuhos at pagtapon
ng inigib na tubig
upang matighaw
maraming pagka-uhaw;
palibhasa laman nitong 
ating banga ay mga kasalanan
kaya sa katanghaliang-tapat
tayo ma'y sumasalok 
gaya ng Samaritana 
upang ikubli 
sa mga mata ng iba
ating pagkakasala.

O kay ganda marahil
katulad ng Samaritana
matagpuan sa katanghaliang
tapat itong si Hesus
pagod at naghihintay
sa ating pagdating
upang tayo ang kanyang
painumin ng mga salitang
nagbibigay buhay
at tunay na tumitighaw
sa lahat ng ating pagka-uhaw;
panalok ng Panginoon
ay sariling buhay
sa atin ay ibinigay
doon sa Krus nang
kanyang ipahayag
siya man ay nauuhaw,
isang magnanakaw
kasama niyang nakabayubay
doon din sa krus
sa kanya ay nakiinom
sa Paraiso humantong!

Itong balon ni Jacob
paalala ng matandang tipan 
binigyang kaganapan ni Hesus 
nang ipako siya sa krus
noon ding katanghaliang tapat
ng Biyernes Santo;
sa kanyang pagkabayubay 
at pagkamatay sa krus
siya ang naging balon
at panalok ng tubig
na nagbibigay-buhay
dito na sa ating puso at
kalooban bumabalong;
kung sa bawat pagkakataon
tayo ay tutugon
sa kanya doon sa balon,
atin ding mararanasan
at malalaman na sadyang higit
at di malirip ang tubig niyang bigay 
sinalok ng sariling buhay
upang tayo ay makapamuhay 
ng walang hanggan!  Amen.