“Bagong Taon, Bagong Panahon”

Lawiswis ng Salita ni P. Nicanor F. Lalog II

Ika-01 ng Enero 2019

Maraming pong salamat

Mga ginigiliw kong tagatangkilik

Nitong dati kong panaginip

Maisatula aking mga tilamsik ng pag-iisip.

Madalas tuwing bagong taon

Sa pagharap natin sa mga paghamon

Lagi nating tugon ay new year’s resolution

Na kalauna’y mga pangakong nababaon.

Hindi tayo makakasulong taun-taon

Kung parati mayroon tayong mga rason

Alibi at mga dahilan para bigyang katwiran

Iba’t ibang sitwasyon kaya tayo hindi makaahon.

49548159_10157026686917996_7763111631847948288_n

Bagong taon, bagong panahon

Bawat pagkakataon ay isang paghamon

Ng pagpapakatotoo sa ating pagkatao

Kung ibig nating lumago, iwanan nakaraan,

Mamuhay sa kasalukuyan, pag-aralan mga dating kamalian;

Mga sugat nating kinasaktan, huwag nang takpan

Bagkus pahanginan sa kasalukuyan upang tuluyang gumaling

Para ating maibaling mga paningin sa mga dapat gawin at ayusin.

Bagong taon, bagong panahon

Pumalaot sa mga dakong di nasusubukan o napupuntahan

Magsagwan kung kinakailangan

Sa gitna nitong ilog ng buhay na walang katiyakan

Maliban sa tahakin landas ng kabutihan at kababaan

Tulad ng pananalangin sa awa at habag ng Maykapal;

Hindi magtatagal lahat ng ating pagpapagal

Sa ati’y dadatal mga dasal nating inuusal.

*Larawan ay obra ng Bulakenyong pintor na si Aris Bagtas; pinili ko ang larawang ito upang maipakita ang pakikibaka ng may tuwa sa bagong taon ng 2019. Ginamit ng may kapahintulutan.

“Kaya May Araw ng Pasko”

Lawiswis ng Salita ni P. Nicanor F. Lalog II

Ika-26 ng Disyembre 2018

Ilang araw bago sumapit araw ng Pasko

Nakaramdam ako ng magkahalo na pagkahapo at lungkot

Dahil sa masalimuot at nakakainis na ilang tao at sitwasyon

Sinabayan pa ng maghapong pag-ulan, Biyernes hanggang Lunes.

Pilit kong nilabanan mga hindi magandang nararamdaman

Dinagdagan pahinga at tulog, higit sa lahat ang pagdulog sa Panginoon

Upang ilahad sa Kanya lahat ng aking tanong

Na banayad naman Niyang sinagot tila baga sa pag-ambon.

Hindi ba nang isinilang Siya noon, napakagulo din ng panahon?

Noon pa man hanggang sa ngayon,

May mga tao pakiramdam o paniwala na sila ang Kristo –

Tagapagligtas ng mga tao pero kung umasta, diktador at emperador?

Kunwari’y malasakit sa mga tao ginagawa,

pero “ego” nila ang walang pagsasawa;

Lahat ng kanilang ginagawa kunwa’y para sa madla

At marami ang natututwa na di alintana pagwasak ng buhay

Pagsira ng pagbubuklod bilang bayan, simbahan, at tahanan.

Kay sarap paglimi-limihin itong Panginoong Hesus natin

Likas na dakila at makapangyarihan, piniling maging maliit

Upang itong tao na likas na maliit at laging nagpipilit magmalaki

Mabatid na ang pinakamakapangyarihang puwersa

Ay ang pag-ibig na naroon lamang sa kababaang-loob at kahinaan.

Ito ang dahilan kaya mayroong araw ng Pasko:

Upang lagi nating maalala na ang Diyos ay naparito dahil nga sa gulo,

Isinilang ang Kristo sa gitna ng kadiliman dahil gayon ang mundo.

Ibinalot sa lampin at inihiga sa sabsaban

Dahil noon pa man hanggang ngayon, Siya ay tinatanggihan ng karamihan.

Kung ating titingnan lamang mga kaguluhan

At iba pang mga kalabisan sa mundo at buhay natin

Minsan man lamang isang araw maalala natin tuwing Pasko

Ang Diyos ay naparito upang samahan tayo sa lahat ng ito

At kung Siya patutuluyin at pananatilihin sa ating piling

Tiyak ang ibayong biyaya at pagpapala dahil laging Pasko sa atin!

(Mga larawan mula sa Google.)

Ano Nga Ba ang Inaabangan sa Pasko?

Lawiswis ng Salita ni P. Nicanor F. Lalog II, Ika-20 ng Nobyembre 2018

Minsa’y nagmisa ako sa aming mababang paaralan

At sa aking panimula aking nausisa mga bata

Kung ilang araw na nga lang ba ang Pasko?

Nag-uunahan, nakangiti na tila baga bumabati

At kasali sa laban o bawi, buong galak nilang sinabi

“41 days before Christmas!”

Ako’y nagulat, kanila pala’ng inaabangan

Araw ng Pasko kaya’t bilang nila kung ilang araw na lang

Habang ako nama’y nagulantang sa gayong katotohanan.

Bakit nga ba tayo sabik sa araw ng Pasko?

Ano nga ba ating inaabangan

Palagi tayong mayroong countdown?

Kung ang Pasko ay isang petsa nga lang,

Bakit hindi na lang tayo magbilangan

Bagong Taon pa lamang?

Madalas sa ating karanasan

Tayo ma’y natitigilan kinagabihan ng Pasko

Lalo na’t nagkaubusan ng pagkai’t mga pamaskong pinaghandaan.

Ito nga lang ba ang dahilan at kahulugan ng Kapaskuhan?

Lahat ng kaabalahanan at kapaguran sa paghihintay

Di malaman kung napasaan?

Kung ating pagninilayan diwa ng Pasko

Araw-araw itong maipagdiriwang kung sa puso natin sumisilang

Itong si Hesus at hindi sa sabsaban.

Higit sa petsa ng Kanyang kapanganakan

Ang Pasko ay isang kaganapan nang makialam

Sa ating kaguluhan ang Diyos na walang hanggan;

Kanyang pinunan, ating kakulangan

Binigyang saysay buhay nating walang kabuluhan

Upang tayong sinilang sa kasalanan, magkaroon ng kabanalan.

Mamuhay tayo’ng lagi sa Kanyang kapanatilihan

Upang ngayon pa lamang ay maranasan hatid Niyang kagalakan

Kesa ito’y abangan at malibang sa pagbibilang ng petsa at buwan.

Larawan ay kuha ng may-akda, Belen ng Manor House sa Camp John Hay, Baguio, Nobyembre 2017.

Magtanong Kay Hesus, Sagot Niya’y Nasa Krus

Lawiswis ng Salita//P. Nicanor F. Lalog II//Ika-06 ng Nobyembre 2018

Madalas ako ay nagtatanong

Kay Hesus na ating Panginoon

Mga sari-saring bagay

Kadalasa’y sumasagitsit sa aking pagninilay.

At sa tuwing ako’y may katanungan

Naroon akong lagi sa paanan ng krus Niyang banal

Kung saan din aking natagpuan itong katotohanan

Na sa bawat katanungan kay Hesus,

Sagot Niya’y naroon din sa Kanyang Krus!

Halika, inyong subukan inyong katanungan

Upang masakyan aking pakahulugan:

Hesus, ako ba ay iyong mahal?

Tingnan Kanyang sugatang katawan, huwag nang mag-alinlangan.

Hesus, bakit ako’y laging nahihirapan?

Pagmasdan kanyang pinasan, ika’y magagaanan.

Hesus, ika’y nasaan sa aking kagipitan?

Bago pa man itong aking pinagdaraanan, naroon na Siyang unang nasaktan!

Laging pakatandaan, ano man ang ating katanungan

Sagot matatagpuan sa sugatang Niyang katawan

Na Kanyang inalay bilang katubusan sa ating mga kasalanan

Na siyang pinagmulan nitong marami nating katanungan.

*Salamat sa larawan kuha ng dati kong mag-aaral sa ICSB, Arch. Philip Santiago noong Setyembre 27, 2018 sa Simbahan ng San Giovanni Rotondo, Italya kung saan naglingkod si San Padre Pio. Isa ito sa mga mosaic doon nagsasaad ng malalim niyang debosyon sa nakapakong si Kristo gaya ni San Francisco ng Assisi. Kapwa sila biniyayaan ni Hesus ng stigmata, mga sugat tulad ng tinamo Niya noon sa krus.