“Pangangahas ng Puso Kay Kristo”

Lawiswis ng Salita ni P. Nicanor F. Lalog II, Ika-04 ng Disyembre 2018

Adbiyento… ang apat na Linggong paghahanda sa pagdating ni Kristo

Ngunit kung ating mapagtatanto, umalis ba talaga si Kristo

At dapat nating paghandaan pagbabalik Niyang totoo?

Hindi ba’t lagi naman Siyang naririto at tayo lang ang nalilito

Tuliro sa panahon ng Pasko na ika ng iba Christmas rush kuno

Minamadali ang Pasko pero naiiwan naman si Kristo.

Sa paglipas ng maghapon, ating bang naitatanong

Kung nasaan Siyang ating Panginoon,

Maliban lamang kung tayo’y sumusuong sa mabibigat na paghamon

Dahil mas paniwala tayo sa moderno at usong magugunaw na ang mundo

Habang pilit na sinisiksik sa ating mga isip ng teknolohiya at media

Na wala ng oras, wala na tayong tutuluyan pa kaya ang lahat ay madaliin at pagaanin.

Sa ating pagkahumaling sa ano mang magaling, lahat ay ating sinisikap agad tapusin

Panay naman ating daing na di natin kakayanin gayong lahat ay nalalampasan din

Dahil taliwas sa diwa ng pagdating ni Kristong Panginoon natin

Pinapaalala ng Adbiyento na bagama’t magwawakas itong panahon natin

May sapat na oras at puwang si Kristo para sa atin

Upang tayo ay Kanyang makapiling, mapuspos ng Kanyang blessing.

Ngayong panahon ng Adbiyento, sana’y pangahasan nating

Suriing maigi yaring puso natin, alamin at timbangin totoong pinakamahalaga sa atin

Pangahasan na damhin at ranasin si Kristong nananatili sa puso at buhay natin

Dahil kung hindi natin ito gagawin ngayon din

Kailan ma’y hindi Siya darating

Kung wala Siyang puwang sa puso natin.

*Larawan ay kuha ng may-akda ng kanilang Advent wreathe sa Parokya ng San Juan Apostol at Ebanghelista, Gov. F. Halili Ave, Bagbaguin, Sta. Maria, Bulacan, ika-2 ng Disyembre 2018.

Ano Nga Ba ang Inaabangan sa Pasko?

Lawiswis ng Salita ni P. Nicanor F. Lalog II, Ika-20 ng Nobyembre 2018

Minsa’y nagmisa ako sa aming mababang paaralan

At sa aking panimula aking nausisa mga bata

Kung ilang araw na nga lang ba ang Pasko?

Nag-uunahan, nakangiti na tila baga bumabati

At kasali sa laban o bawi, buong galak nilang sinabi

“41 days before Christmas!”

Ako’y nagulat, kanila pala’ng inaabangan

Araw ng Pasko kaya’t bilang nila kung ilang araw na lang

Habang ako nama’y nagulantang sa gayong katotohanan.

Bakit nga ba tayo sabik sa araw ng Pasko?

Ano nga ba ating inaabangan

Palagi tayong mayroong countdown?

Kung ang Pasko ay isang petsa nga lang,

Bakit hindi na lang tayo magbilangan

Bagong Taon pa lamang?

Madalas sa ating karanasan

Tayo ma’y natitigilan kinagabihan ng Pasko

Lalo na’t nagkaubusan ng pagkai’t mga pamaskong pinaghandaan.

Ito nga lang ba ang dahilan at kahulugan ng Kapaskuhan?

Lahat ng kaabalahanan at kapaguran sa paghihintay

Di malaman kung napasaan?

Kung ating pagninilayan diwa ng Pasko

Araw-araw itong maipagdiriwang kung sa puso natin sumisilang

Itong si Hesus at hindi sa sabsaban.

Higit sa petsa ng Kanyang kapanganakan

Ang Pasko ay isang kaganapan nang makialam

Sa ating kaguluhan ang Diyos na walang hanggan;

Kanyang pinunan, ating kakulangan

Binigyang saysay buhay nating walang kabuluhan

Upang tayong sinilang sa kasalanan, magkaroon ng kabanalan.

Mamuhay tayo’ng lagi sa Kanyang kapanatilihan

Upang ngayon pa lamang ay maranasan hatid Niyang kagalakan

Kesa ito’y abangan at malibang sa pagbibilang ng petsa at buwan.

Larawan ay kuha ng may-akda, Belen ng Manor House sa Camp John Hay, Baguio, Nobyembre 2017.

Kung Ikaw Si Bartimeo?

LordMyChef “Lawiswis ng Salita” Ika-30 ng Oktubre 2018

Hanggang ngayo’y hindi ko makalimutan

Magandang tagpo ng ebanghelyo nitong Lingong nagdaan

Kuwento ng bulag na si Bartimeo, isang pulubi sa gilid ng daan.

Sa kanyang kapansanan ay siya lamang nakaalam

Kay Kristong dumaraan kaya’t siya’y dumalanging pasigaw

“Hesus, anak ni David, mahabag po kayo sa akin!”

Ngunit siya’y pinagsabihang manahimik

Kaya’t lalo pa niyang ipinilit kanyang giit,

“Anak ni David, mahabag po kayo sa akin!”

Tumingin at tumigil si Hesus upang siya’y tawagin at tanungin,

“Ano ang ibig mong aking gawin?”

“Panginoon, ibalik po ninyo aking paningin” agad niyang hiling.

Kung ikaw si Bartimeo tatanungin ng Panginoon natin

“Ano ang ibig mong aking gawin?”

Ano nga kaya ang iyong hihilingin?

Mga palagiang alalahanin tulad ng salapi at pagkain?

O mga lugar na inaasam, minimithing marating?

O marahil ay alisin mga pasanin at dalahin?

Sadya namang marami tayong naisin at ibig hilingin sa Panginoong natin

Ngunit kung ating lilimiin bulong ng ating saloobin at damdamin

Isa lang naman kung tutuusin kailangang natin:

Nawa tulad ni Bartimeo, mabuksan mga paningin natin

Upang pananampalataya ay mapalalim

At maliwanagan itong buhay natin.

Aanhin mga malinaw na mata na sa kinang ng ginto at pilak nahahalina

Ngunit di makita ni makilala mga taong tunay at tapat nagmamahal sa atin

Na pawang salamin ng Diyos nating butihin.

Kaya kung sakaling ikaw ay hihiling, si Bartimeo ang gayahin

Sana’y huwag mong limutin, kaliwanagan sa puso’t loobin

Upang Diyos ang makita at kamtin at Siyang maghari sa atin.

*Unang larawan ay kuha ng may-akda sa Sonnemberg Mountain View, Davao City, Agosto 2018. Ang ikalawa nama’y hango sa Google Images.